'O pueta

Ve dico, amice care, pe 'nu poco
'e chi 'int'e vene 'nce teneva 'o fuoco,
'e chi, parlanno 'e Napule, senteva
'a musica d'o mare 'e suspirà.

Quant'anne so' passate e, ce penzate,
mo quante e quante cose so' cagnate,
ma nuie cercammo ancora 'e 'stu Pueta
quacche canzona ca po' fa sunnà.

E si 'ncuntrate 'a luna a Marechiare
- a stessa luna ca p'e notte chiare
spuntanno ne sentette serenate -
'e chillo, certo, v'arricurdarrà:

cu Napule teneva appuntamento
'stu Pueta e a sera tutt'argiento
facette 'sti culure 'e chistu mare,
d'e vicule e d'e strade e' 'sta città,

cuntaie 'sti Cunte chine 'e nustalgia,
facette 'e 'stu paese 'na poesia,
e 'sti canzone soie vanno 'p'o munno
facenno 'e nammurate suspirà.