Opere minori 1 (Ariosto)/Poesie latine/Liber primus/Carmen XV
 |
Questo testo è completo. | |
| ◄ | Liber primus - Carmen XIV | Liber primus - Carmen XVI | ► |
XV.
DE VELLERE AUREO.
O pubis iuvenes robora thessalæ,
Perculsi toties qui pelagi minis,
Pellem avertere Colchis
Auratam capitis tamen:
Olim pollicita est vobis, et innuba
Pallas velivolam cum daret æquori
Pinum, quam sub opaci
Flexit vertice Pelii,
Cur non lecta manus fortiter occupat
Portus phasiacos, dum boreæ silet,
Vestris sæpe sinistri
Votis, spiritus impotens?
En vobis spolium tempus apiscier;
Famosæ pecudis limina, quod diu
Servavere dracones,
Martisque ignivomi boves.
Insomnes etenim destituit vigil
Serpens excubias, ut fera beluis
Olim infensa marinis,
Post terrestribus aspera.
Et nunc vipereas in latebras ruens,
Illum sanguineis anguibus undique
Pressum turbat, et ore
Semper cædibus oblito.