Pagina:Çittara zeneize 1745.djvu/180

Da Wikisource.

VI.

F
iniremmo in Maria sempre con l’Ave;

Ave s’ódirà subito a desteizo.
Per quelle lontanançe de Pareizo,
Tanto dexideroze d’onorâve.

Ri Angeri in ton de muxica soave,
Impossibile a noî d’esse compreizo,
Sença un minimo impaccio ò contrapeizo,
Corriran da pertutto a cortezzâve.

E dopo aveive con ghirlande e treççe
Chi de scioî, chi de perle donativi,
Chi fæto in atri mœui mille careççe,

Con re Muze e con noî tutti festivi
Faran conçerto dre vostre allegreççe
Là per quelli crestalli sempre vivi.