Pagina:Goldoni - Opere complete, Venezia 1908, II.djvu/601

Da Wikisource.
Jump to navigation Jump to search

LA BUONA MOGLIE 591

SCENA XXV.
Bettina e Pantalone.

Pantalone. Dove andeu, niora?

Bettina. Mi vago a casa, sior missier.

Pantalone. Aveu visto vostro mario?

Bettina. Sior sì.

Pantalone. Cossa diselo?

Bettina. Adessadesso el vegnirà a casa anca elo.

Pantalone. No credo gnente. V’halo dito la baronada ch’el m’ha fato?

Bettina. Oh, ch’el xe tanto pentio!

Pantalone. I soliti pentimenti.

Bettina. L’ha infina pianto.

Pantalone. Anca co mi l’ha pianto, e pò l’ha fato pezo.

Bettina. Sta volta el dise dasseno.

Pantalone. No no, no ghe credo più. Niora, andè a tior el putelo, e vegni a casa mia.

Bettina. Senza de Pasqualin?

Pantalone. Lasse ch’el vaga quel desgrazià.

Bettina. Oh mi no, sior missier, senza de lu no vegno.

Pantalone. E dove xe i vostri manini? (osservandole le braccia)

Bettina. I manini? I ho lassai a casa.

Pantalone. A casa i ave lassai? Dove i aveu messi?

Bettina. In cassa.

Pantalone. In cassa? Deme mo la chiave de la cassa.

Bettina. Oh, la me compatissa. La chiave de la mia cassa no la dago a nissun.

Pantalone. No ve fide de mi? Cossa gh’aveu paura?

Bettina. Gh’ho de la roba in cassa, che no vôi che nissun la veda.

Pantalone. Gh’aveu contrabandi?

Bettina. Nualtre donne gh’avemo de le tatare1 che i omeni no le ha da veder.

  1. Tattere.