 |
Questa pagina è stata trascritta, formattata e riletta. | |
| I PETTEGOLEZZI DELLE DONNE | 483 |
Checca. E se nol volesse che sposasse Beppo?
Toni. Bisogneria che lo licenziessi.
Checca. Oh poveretta mi! Credemio che el possa dirme de no?
Toni. Chi sa! Pol esser che el ve voggia mandar con qualche persona de meggio condizion.
Checca. Sior pare... Sentì, sarè sempre mio pare.
Toni. E mi ve vorrò sempre ben come fia.
Checca. Sior pare, se me volè ben, feme un servizio.
Toni. Cossa vorressi?
Checca. Lassè che me sposa con Beppo, avanti che lo sappia quell’altro sior pare.
Toni. Cara fia, no lo vorria desgustar.
Checca. Co la sarà fatta, nol dirà gnente.
Toni. Che penseremo.
Checca. Caro papà, se me volè ben.
Toni. (La me fa peccà).a (da sè) Via, farò de tutto per consolarve.
Checca. Se perdo Beppo, no passa tre zorni che me ammalo, e che moro dalla passion. (parte)
Toni. Farò de tutto che no la lo perda. Povera putta, ghe vorrò sempre ben. (parte)
SCENA III.
Strada.
Beppo, poi Cate.
Beppo. No vedo l’ora de abbrazzar la mia cara Checchina. Causa quelle pettegole, che l’ho squasi persa.
Cate. Abagiggi, abagiggi.
Beppo. Siora Cate, avere savesto che Checca no xe una bastarda.
Cate. Abagiggi, abagiggi.
Beppo. Cos’è sto bagiggi? Xela matta custìa?
- ↑ Mi fa compassione.
