 |
Questa pagina è stata trascritta, formattata e riletta. | |
| LE DONNE GELOSE | 153 |
co voggio. Oh, vôi andar un pochetto da siora Tonina! Xe giusto ora a proposito per starghe poco, perchè, co la scomenza, la dà fette che no fenisse mai. La pratico cussì per cerimonia, da resto no la posso soffrir. (batte da Tonina)
(Voce di dentro) Chi è?
Lugrezia. Amici boni. (aprono, e va in casa
SCENA XVIII.
Camera in casa de siora Tonina.
Siora Tonina e siora Giulia, poi siora Chiaretta.
Tonina. La me xe andada mo zoso per i calcagnia.
Giulia. Le xe cosse che passa tutti i doveri.
Chiaretta. Siora Tonina, sala chi xe?
Tonina. Chi, fia?
Chiaretta. Siora Lugrezia in mascara.
Tonina. Eh via!
Giulia. Oh magarib!
Chiaretta. Siora sì, in verità. Tonia m’ha dito che ghe lo vegna a dire1, e intanto la la trattien a chiaccole. (parte)
Giulia. La lassa che la vegna. (a Tonina)
Tonina. Cara siora Giulia, in casa mia no vorave che fessimo pettegolezzi. Se vien mio mario, poveretta mi. Quei de susoc i sente tutto. Cara siora, la prego, la dissimula, la usa prudenza.
Giulia. Gh’ala paura? La lassa parlar a mi.
Tonina. Me xela amiga, siora Giulia? Me vorla ben?
Giulia. No vorla!
Tonina. La me fazza un servizio, cara ela, la vaga in quell’altra camera, per no aver occasion de criar.
Giulia. Me vien voggia de chiapparla per el collo, e de dargliene fin che me stufo. Oh, sarà meggio che vaga via.
- ↑ Zatta: dir.
