Pagina:Goldoni - Opere complete, Venezia 1910, VIII.djvu/170

Da Wikisource.
160 ATTO SECONDO

Tonina. Oh che donna! Oh che lengua! (parte)

Giulia. Oh che soldadon! Oh che sbirra! (parte)

SCENA XXII.

Sala del Ridotto, con tavolini, sedie e lumi; varie maschere che stanno giocando,
e altre che discorrono1.

Siora Orsetta in mascara, siora Fabia2 in bautta.

Orsetta. Xe ancora a bonora; gh’è poca zente al Redutto. Vorla che se sentemo? che chiappemo posto? (Fabia fa moto che vada avanti, e vanno a sedere ad un tavolino)

Orsetta. (Almanco vegnisse sior Baseggio a Redutto!) (da sè)

SCENA XXIII.

Siora Lugrezia in mascara, con Arlecchino in bautta3, e detti.

Lugrezia. Avanti che vegna più zente, sentemose qua. (siede ad un altro tavolino)

Arlecchino. Quel che la comanda, siora Lugrezia.

Lugrezia. Zitto, sieu maledetto! No me nominè per nome.

Arlecchino. Mo cossa gh’oio da dir?

Lugrezia. Siora mascara se dise.

Arlecchino. La compatissa, imparerò. (siede)

Orsetta. (Ala sentìo? La xe siora Lugrezia quella mascara). (a Fabia, e lei senza parlare ride)

Arlecchino. Comandela gnente, siora mascara Lugrezia?

Lugrezia. Andeve a far squartar, sior aseno. (Orsetta e Fabia ridono)

Arlecchino. Mo perchè?

Lugrezia. V’ho dito che no me stè a nominar, che se dise mascara, e no se dise altro.

  1. Bett. ha invece: Redutto in portego, in crozzola de vecchi, coi so taolini e careghe a uso de Redutto. La so chiocca con quattro candele de seo, tre impizzade (a) e una stuada (b). Do taolini in fondi, co le so candele de cera, con de le mascare che zioga, e delle mascare che discorre, (a) Accese, (b) Ammorzata.
  2. Bett. aggiunge: so mare.
  3. Bett. aggiunge: senza gran cargadura (a), (a) Caricatura.