Pagina:Goldoni - Opere complete, Venezia 1911, XII.djvu/173

LE MASSERE

167

E po vestia cussì paro più bella ancora;

Co son un poco rossa, gh’ho un viso che innamora.
Anzoletto. Questa me par la vecchia.
Rosega.   Sento zente, me par...
Oh, velo qua dasseno: me voggio inmascherar.
Anzoletto. Patrona, siora maschera.
Rosega.   (Nol me cognosse, oh bella!)
Anzoletto. La diga. Favorissela? eh via, che la xe ella.
La cognosso dall’occhio, che bisega¹ in tel cuor.
El vedo sotto el volto quell’occhio traditor.
Via, scoverzì le vostre bellezze sfondradone.²
Rosega. Mo ti xe un gran baron da cognosser le done.
(si smaschera)
Anzoletto. Quando che se vol ben, se cognosse seguro.
Rosega. Me vustu ben dasseno? Zurelo.
Anzoletto.   Ve lo zuro.
Rosega. Andemo.
Anzoletto.   Semio soli? Zanetta no la vien?
Rosega. Su do scagni, sior sporco, el cesto³ no se tien.
Anzoletto. No avemio stabilio d’andar in compagnia?
Rosega. Le troveremo in Piazza; vegni qua, andemo via.
Anzoletto. Dove voleu andar?
Rosega.   A bever un caffè.
Anzoletto. Anderemo coi altri. Xe a bonora, aspettè.

SCENA IV.

Momolo e detti.

Momolo. Mascare, m’ha manda siorà Zanetta, a dirve

Che no la stè a aspettar, che no stè a trattegnirve.
In maschera la xe con un’altra puttazza,
E tutti adessadesso se troveremo in Piazza.

1. Che fruga, stuzzica ecc.: vol. I, 454; II, 159 ecc.
2. «Sterminate, senza confine: Cameroni, l. c.
3. Deretano.