Pagina:Goldoni - Opere complete, Venezia 1914, XVIII.djvu/485

Da Wikisource.

LA BUONA MADRE 469

Nicoletto. Mi siora? mi no, la veda. (con timore)

Barbara. Se te la dasse mi la novizza, la toressistu?

Nicoletto. Oh giusto ela!

Barbara. Se te dasse sior’Agnese?

Nicoletto. Oh sior’Agnese! (vergognandosi)

Agnese. Mi donca no me toressi?

Nicoletto. Mi sì che la torave. (piano ad Agnese)

Agnese. Oe, l’ha ditto de sì, che el me torave. (a Barbara, ridendo)

Nicoletto. Oh, subito la ghe lo va a dir.

Barbara. Via, via, fio mio. A monte tutto quel che xe stà. Sior’Agnese gh’ha dell’amor per mi, e gh’ha dell’amor per ti, e se ti xe contento, mi te la dago, e la sarà ela la to novizza.

Nicoletto. Oh sièla benedetta! (salta e l’abbraccia)

Barbara. Innocenza, sala! tutta innocenza. (ad Agnese)

Agnese. Vedeu, che disevi che no ve volevi maridar? (a Nicoletto)

Nicoletto. No saveva miga gnente mi, no saveva.

Agnese. Seu contentu?

Nicoletto. Mi sì, quando?

Agnese. Mo! quando che se poderà.

Barbara. La lassa far a mi, sior’Agnese, che procurerò...

Agnese. E arecordeve ben, che cortelli no ghe n’avè da portar.

Nicoletto. Chi gh’ha ditto del cortello?

Agnese. Margarita.

Nicoletto. Che schittonaa!

Barbara. Margarita gh’ha sto vizio; ma ghe lo leverò mi.

Margarita. Siora patrona...

Barbara. Anca del cortello ghe sè andada a dir.

Margarita. Oh sì, altro che cortello! Sala chi ha battù? Sala chi ghe xe alla porta?

Barbara. Chi?

Margarita. Quelle donne de calle dell’oca.

Nicoletto. Oh poveretto mi.

  1. Chiacchierona, che dice tutto.