Hic pira, quæ latiis transcripsit bosphorus hortis
Principis a solo nomine dicta sui;
Nec non Felsineis deducta e collibus illa
Quæ a caro et pulcro nomine nomen habent.
Castanea, unedo, nux, adsunt, zizypha, pinus
Quæ decori est hortis, et decori arboribus.
Nec memoranda mihi plures dulcissima ficus,
In formas missa quas dedit insitio;
Nec quæ plebeis campis spectata, referre
Hortis est animus condita nobilibus:
Multaque præterea, quæ jam peregrina tulere
Litora, quæque loci protulit ingenium:
Quæ qui scire velit, velit idem noscere quotquot
Plantarum species Itala terra parit,
Quas patribus placuit deducere montibus altis,
Et quas de extremis vellere litoribus.
Arbor adest (unde ignotum) redimita racemis,
Quœ referat vitem protinus indigenam;
Altera cyaneum promit (res mira) phaselum
Quem dicunt medicam et adfore torminibus:
Hanc simul et truncos oleæ Verona Taburno
Aemula baccifero, et parvula mala dedit,
Quæ referant dulces acido sub cortice succos,
Aestivis (mirum!) temporibus propria.
Benacus rheda citros deduxit onustas
Pomis et foetas floribus innumeris.
Et myrti, laurique simul transvexit odora
Virgulta, Eoi cum piperis frutice.
Pulcraque Parthenope lotum Sebethide lympha
Citrigenum misit, aurea mala, nemus;
Grata oculis misit grato azariola sapore
Mala, nec antiquis nota, nec indigena.
