Poesie (Porta)/163 - Se no poss - fà quij coss - el mè Togn
Aspetto
Questo testo è completo. |
Carlo Porta - Poesie (XIX secolo)
163 - Se no poss - fà quij coss - el mè Togn
◄ | 162 - Nonostant che in sta cà sta sort de sciall | 164 - LA COMETTA DEL LUJ 1819 ALLA SURA BIETTA | ► |
Se no poss - fà quij coss - el mè Togn
che vorrev in sto dì - fà per tì
per mostratt - e provatt - che i cologn
hin manch sald dell’amor ch’hoo per tì
l’è perché - quell che gh’è - in del bolgin5
el se confa giust giust - in sul gust
de sto quindes meschin - piscinin
che nol slarghen - nanch i arghen - de Bust.
Ma deggià - che de fà - di gran sciaj
l’è ona robba spallada - in giornada,10
te foo onor - cont el fior - di regaj,
con sta cara st’allegra bregada.
E la invidi - e la sfidi - a braggià
col biccer del bombas - sott al nas:
Viva el Togn! e a giurà - de tornà15
per cent agn, in sto dì, s’el ghe pias.