Ve scrivi quatter vers ambrosian
mezz longh mezz curt, inscì come Dio voeur,
talis qualis me sponten in del coeur
e passen in la man.
In sta manera vegni soeuli soeuli5
a div i mee reson come in scarliga,
resparmi la fadiga,
e me van i mee coss mej che né on oeuli.
E poeù sto sfros che foo a l’Abaa Giavan
el me va in sangu e el me someja bon10
pussee che a on tabaccon
ona presa de foeuja de Lugan.
N’eel deffatt on guston
a faghela a sti fioeuj de settimana,
a sti prepotenton15
che se creden la scuma di sapient
domà perché hin parent
del boffacrusca de la cà Brentana?
Però intant, el mè Gross,
che mì me scarpi el goss, lor coj soeu astuzzi20
hin fors adree a cattà el luzzi gambuzzi
che ghe ong la cusina
e ghe paga la crusca per farina.
Donca vegnimm a nun: Chi è matt, sò dagn;
e cazzincula al sur Abaa e Compagn.25
Oh che cara, oh che bella, oh che stupenda
vitta scialosa che te fee, o Tommas!
Se te vee innanz inscì,
t’ee de ciappà ona motria reverenda
e dò ganass che t’han de seppellì30
anch quella pocca pinola d’on nas!
Dormì, bev e mangia!
mangià, bev e dormì!
senza olter obblegh tra sto gran deffà
che de incastragh quaj ciaccer e quaj lapp,35
e poeù doman de capp
a dormì, mangia e bev...
oh che gust, oh che spass, oh che sollev!
Benedetto Trevij, borgh del Signor!
Che te staga lontan di tò muraj40
i malann, i travaj;
che on’aria semper fresca e remondina
la possa girà semper sul mezzdì
intorna a la dispensa e a la cantina,
che la te possa rescià sù e inranghì45
quell moscon malarbett
che sassina i pollaster e i polpett;
che la possa a on besogn
trovass lì semper a desposizion
de quij desgraziadon50
che stanten per el cold a ciappà sogn!
Nò, nò, Tommas, no stà a legg pù per brio!
S’el te cria el sur zio,
el gh’ha reson; no stà a legg pù, Tommas;
godet in santa pas - sto ben de Dio.55
Pensa che on bell culazz
e ona s’cenna e ona trippa relevada
che impissa tutta ona cardega armada
hin in sti temp del cazz
quell che ghe voeur per fass reputazion.60
Set grass? te dan del don;
set pell e oss?
te petten del balloss!
E adree al don già te see
quanci onor ghe stravacchen i badee.65
Ora mò sti mezzenn tant nezzessari,
sti s’cenn, sti taffanari
se quisten fors col studi e col struzziass?
Ohibò, ohibò, el mè Tommas,
se quisten con la pas70
e con la santa flemma di ganass!
Inscì possess anmì
dà on pè in la seggia e vegnì chì cont tì
a spartitt la fadiga del paccià,
a juttatt per on mes a fà nient.75
Gesuss che gust! domà a tirall in ment
me senti a ciappottà.
Vorrev giurà denanz al Crozefiss
de Comm, che l’è inscì tant miracolos,
de morì anca mì in cross80
vorrev fina pregall ch’el me innorbiss
s’el me catta ona sira
a god on sgrizz de lumm d’ona candira,
o el lumm d’on stoppin pizz,
se no l’è per reson85
de invià giò polit quell pocch boccon.
Tutt al pù, tutt al pù, via de sto cas,
me servirev del lumm d’on quaj mocchett
per vedegh a andà in lett
e per fà ciar al mè car sur Tommas,90
quand ch’el se pienta
in la streccioeura de la mia parenta.
Ah el rid adess?... adess nee el fa bocchin?...
Bravo sur Tommasin!
Me ne rallegher tant de la cuccagna.95
Olter che mangià, bev, e che dormì!
E quella cossa lì
la se bev, la se dorma, o la se magna?
Bravo, bravo, per brio,
bravo sur Tommasoeu!100
Ehi! giustemm quell lenzoeu... l’è chì el sur Zio!
