Poesie (Porta)/91 - MILAN 19 OTTOBER MILLA VOTT CENT DESDOTT

Da Wikisource.
Jump to navigation Jump to search
91 - MILAN 19 OTTOBER MILLA VOTT CENT DESDOTT

../90 - LA NOMINA DEL CAPPELLAN ../92 - Semm giamò ai vott de April, gh'emm la stagion IncludiIntestazione 27 settembre 2008 75% poesie

Carlo Porta - Poesie (XIX secolo)
91 - MILAN 19 OTTOBER MILLA VOTT CENT DESDOTT
90 - LA NOMINA DEL CAPPELLAN 92 - Semm giamò ai vott de April, gh'emm la stagion

 
MILAN 19 OTTOBER MILLA VOTT CENT DESDOTT
MENEGHIN TANDOEUGGIA
AL SCIUR DON ROCCH TAJANA

Epistola

Sicché, Don Rocch, che nol se cruzzia pù
ché adess davvera gh’avaremm i fraa
ch’el n’ha ottegnuu el decrett chi el sa poeù lu.

Pover omasc! l’ha tanto faa e pregaa
che poeù el resgiò l’ha lassaa giò i colzon,5
e per quant el fuss stitegh ghe l’ha faa.

Se dis che hin quatter i corporazion
che tornaran in flore come prima,
Barnabita, Somasch, Oblatt, Biotton;

paren on poo pocchitt a tutta prima,10
ma trattendes che semm sul comenzà
se pò ess content de infiragh dent la scima.

El rest a pocch a pocch el vegnerà,
ciapemm sti quatter e lassemm fà a lor
a slargà foeura i al quand saran là.15

Per mì gh’hoo tanta fed in quell bon scior
che, innanz ch’el moeura, ha de tornà Milan
tutt gris anmò de fraa d’ogne color.

Speri de vedè anmò i Domenican
com’even prima che Giusepp Segond20
el se intrigass de drizzà i gamb ai can.

Oh che bell viv che l’eva allora al mond!
Con quatter ciaccier, senza toeuss la pell,
pioveva l’onc lu de per lu sul tond;

se andava al taff a son de campanell,25
e quand vegneva el punt de la s’cioppada
se se trovava in ciel senza savell,

ché i suffragg e i offizzi a furugada
e i mess e i ottavari a million
ne giustaven la lista innanz vess fada.30

Adess mò i pover mort stan de mincion,
no ghe croda pù on ghell sora quij fiamm,
no gh’è pù on pret che moeur de replezion.

Moriraven paricc anzi de famm,
se nol fuss on inzert de cotta e stolla35
el post de mennà a spass i can di damm.

Ma deggià che gh’emm l’oeuv sott a la polla,
ch’el lassa nass, Don Rocch, quell ch’ha da nass,
e i oss se logaran, gh’en doo parolla.

Già el pian l’è di pù mej che poda dass,40
maduraa come i nespol a l’ombria
fin del temp di bordej e di frecass,

e l’han faa fior de drolli in compagnia
de quij che fan la polt e san mennalla
anch su la barba de la polizia,45

e, per quell che soo mì de vun de balla,
han scompartii de moeud tutt i mestee
che ghe gionti el melon se el colp el falla.

I fraa, quij coj ciapp biott, con biott i pee,
hin destinaa a dà a ment alla gent bassa,50
a mennà per el nas quij del vivee.

Quist chì cont el pretest de batt la cassa
petten l’oreggia e i oeucc fina ai quart pian,
e spionnen se gh’è el lôff dal pel ch’el lassa.

Barnabita e Somasch, pussee magnan,55
ciappotten i conscienz di bescottinn
comodand la moral cont i fasan;

e mennand i damazz per i dandinn
ghe spigollen el mond ch’han vendembiaa
col gust de fagh fà i intrigh e reussinn;60

quant ai scoeul, san ben lor quell che va faa
per tegnì i scinivij di secolar
a riva riva col buell di fraa.

E se i lassaran fà, come ch’el par,
sto illuminaa d’on secol glorios65
el fornirà anca lu de fà tant ciar.

In quant poeù a drizzà in pee di religios
capazz de falla sott con Tamborin
coj argument del manegh de la cros,

gh’è i Oblatt che s’j ciappen de bambin70
e i tiren sù teologh e dottor
tutt a furia de s’giacca e bottaggin.

Poeù i manden in la vigna del Signor,
che han imparaa de lor a lavoralla
con pù l’è granda con pussee savor.75

Sicché el ved, sur Don Rocch, ch’olter no calla
per dagh l’ultema sciampa ai nost legrii
che de vedè el Governo a mett in stalla

quante prima sti quatter fratarij.