Prose e poesie bellunesi 2007/I

Da Wikisource.
Emilio Da Deppo

Veronika, la croda pupa ../ ../II IncludiIntestazione 8 luglio 2015 25% Da definire

Prose e poesie bellunesi 2007 II

EMILIO DA DEPPO (1946)


Veronika, la croda pupa


Le é tante le storie e le leiende che da senpre se conta su le nostre montagne e i laghe dolomitiche, da Misurina a Sorapis e tante tante outre, par no parlà de le longane e bestie pi o manco nventade.

Chela che goi contave l é na fiaba vera. Come pola esse vera na fiaba?, disaré. La é parché na situazion fora usanza, co na cornìs da no crede, la po esiste. L é sucessa a na pupa todesca de nome Veronika, ciavei bionde co le dreze, goie celeste, proprio come che deve esse la tradizion. No é un principe azuro, ma na mare e n pare, che i golea tanto ben. Tante ane fa, l pare - che se ciamea Wolfgang – l a ciatà pa la prima ota su la so strada tanta dente e tante loghe, ma un pi de dute lo à npressionà, tanto da feighi di:

“L ntares de n grupo de crode no l dipende da le dificoltà o se le scalate le é cognosseste, ma da le beleze che crode, val, piante e eghe le fa n duto un con grazia. Pi de dute, l salvargo, parché chesti loghe i é romanteghe. Spordendose da forzele zenza nome sora valoi negre, pien de nee e de père, se po capì e gode la gioia che a ienpì l peto dei prime omin che se a ncognà fra cheste crode.“ E passà tante ane, e Wolfgang no po desmenteasse chel ncontro: ntanto l se à fato na fameia e l à avù na bela pupa. L decide de tornà te chel logo magico e incantà, e de portasse apede la fameia par na vacanza, lontan dai rumor de la cità e dal gris de chei ziei del lisinpon. Inte de se l sogna l verde cioudo del bosco, l core de l ega, i uziei che cianta, i fior de dute i color e chele crode che sà canbià con la magia del di e l ora de siera. E la luna, così iazada cuan che te sos n paes, la spunta npizada da le tori, da le zime, dai mile spizot che i circonda l bosco come a continuà l dogo de lustro e de color che l fardel sol l à apena finì.

Sarala contenta la pupa? se domanda Wolfgang. Siguramente n fameia i avea parlà te le scure e frede siere d’inverno, te la desolada piana batuda dal vento. La curiosità era granda e la tosata spietea con strans la fin de la scola e la possibilità de chel viado longo, verso n posto che parea bel ma te l stesso tenpo pien de robe che no la cognossea.

Cuante ote la maestra a scola avea contà de lupe e orche che da senpre i starea te i bosche! Chesto fastide l à sconbussolà par tanto tenpo la tosata, finche l é ienù l di de caminà. Par Veronika era i ane de le banbole, e come dute le pupe no la rinunziea mai a la so amiga de peza. La ghi parlea, la se confidea, la i darea sicureza te l ndormenzasse col scuro de la note. Le magnea insieme, dividendosse chel che no ghi piasea, e calchi ota le radeghea, par scimiotà chel che suziedea a dute. L treno che le avarae portade n Italia era pronto n stazion. Veronika l é montada su par prima, ntanto che so pare pendea chele valis cosi pesanti, che so mare avea ienpi de maioi, parché la savea che n montagna l tenpo l é stranbo e che n poche ore se po passà da n bel sol al pi tristo dei tenporai.

Anche so pare i avea contà d avè visto brentane de iara, e père grande come automobili rodolà portade dal torente, ienù tristo da le eghe negre dei tenporai. L viado l é stà longo, ma la goia de vardà dai finestrin chi loghe che i se presentea come tante cuadre piturade da la natura i à fato ieni duto pi facile.

Finalmente le Dolomiti! L paes da onde che partia la strada pal rifuio l era pizol, le ciase dute n riga longo la strada, poca dente e calchi rara machina. Era l 1952, te la cità che l avea lassà era confusion, dente piena de dafei, clacson che domandea de podè passà par portà tanta dente, senpre pi dente. Ca duto era chieto, se podea parfin sientì i uziei ciantà e l ega de le fontane che someea ciacolà. Se à vizinà n sior, che con sudizion l a domandà se l era lui l ingegner che dovea esse portà n gip al rifuio. Era proprio na gip, de chele che i soldade americane avea lassà drio la longa storia de guera n Italia. La ienea usada par portà persone e, adatada con dei atreze, travi e bree. L bisuoi de chi ane era de usà tenpo e materiai zenza strazà nia, bisognea dasse da fei, cosi era par la gip che siguramente no farea l viado ndrio goita. Veronika era preocupada, e l so muso no scondea l teror del viado su chel strano biroc’. L fefo che l à te la fotografia l parla pi de mile parole.

La strada era verta, someea che la gip no ghi la faresse a rampegasse, e i rame dei alberi se spostea, n ota carezandoghi l muso n outra ota dandoghi de le biscazade. Finalmente é spuntà chele montagne cosi bele, e l pra onde che era l rifuio, oasi onde che l verde se presentea te dute le so fateze. Chesta scena l à fato di a papà Wolfgang parole cosi bele che solo i pionieri come lui sientia da l anima prima che da la testa: “Auguro che se posse continuà a ienì n ponta de pè tra cheste care montagne, come cuanche era solene l so prinzipio, cosi da sientisse da ele defendeste, come tei di che duto era salvargo e ncontaminà dal on, cuanche vivendo la gioia era intata, pura pienamente. Lassonela pura, alora tornaron, tornaron fin che podaron te cheste corone de montagne divine, contornade da ponte che le và a sprofondasse te l ziel, te chesto mondo de sogne.”

La vita al rifuio la passea chieta, con Veronika, la so banbola e la mare che con pazienza rienpìa le dornade spietando so on, che ogni bonora l partia presto par scopri ogni pi sconto cianton, ogni pèra, ogni piega de chel mar n pè che la natura avea fato con tanta bondanza. Bisognea fei le lezion de le vacanze con scrupol, iutà so mare tei laoret e pi de dute partecipà a la vita del rifuio. La cioura che Rolando l gestor cenea par avé l late pa la so fameia, che la golea conpagnia ranpegandosse su pai pra tra i cogoluz de fien, te l cioudo sol d istade. Era Miranda, la fia de Rolando, che l era come na suor pi granda e che Veronika iutea insieme a Graziana te l fei i laori de cusina e le canbre, cognossendo i segreti de la soa doventù e scoltando le so confidenze, senpre co l orgolio de aveghine la fiduzia, e zerta de conservà inte de se i sogne e l esuberanza. Era l ega che nassea come par miracol da sote le père buciandosse a val par unisse a outre eghe e portà con se forza de vita.

La cesuta l avea desine de crode par canpanil, onde anche na pizola orazion someea la desse n ziel lediera e pi scoltada. Fiaba era duto ntorno e da godesse la vita ten chel remoto cianton del mondo.

L é n confin te la storia del alpinismo, chel che à fato l ingegner Wolfgang Herberg fra cheste montagne, e la so distinzion no à mai golesto acetà n publico riconoscimento. Solo n vezo l se à tolesto e no podea esse n outro modo. Dendo su pal Ciadin d Arade, a sinistra l é l ramo de la Scala Granda, co le paredane a strapionbo unide te na ciadena fissa e duta tacada. A destra, crode pi restogne: Cima d Arade, Punta Koegel, CIMA VERONIKA, e l Monfalcon de Cimoliana. La fiaba de Veronika, la croda pupa l é ncora pi bela e zenza paragoi con al so fianco, poiada su una forzela, la “banbola”. Se po vedele anche dal Rifuio Padova. Par senpre.

(Domeie)