Prose e poesie bellunesi 2008/6

Da Wikisource.
Piero De Ghetto

Solde a bon prezo. ../5 ../7 IncludiIntestazione 27 febbraio 2016 50% Da definire

5 7


PIERO DE GHETTO DE ROCHE DE LISEO (1932)

Solde a bon prezo.

Ai ultime de aprile del cuarantazìnche, an puoce de soldade todesche i se aea intanà in Vilanuova. I no se aspietaa che i americane i ruasse così presto e i à cognù scanpà pi che in pressa e lassà an grun de roba che i aea sturtà su do par l Italia: vestìs, piate, zucher, carne, zigaretes e tanta autra roba, ma pi che see esplosivo, s-ciope, pistoles e muniziones de duta la sortes.

Anche se ió staseo a Cianzìa, aeo an amigo che me contaa duta chesta robes, che me penso ancora al dì d incuoi.

Al me contaa che an riedo de tredes ane, a forza de sciopetà col fusìl mitraliator ize par na perera, l era dù a ora a la destirà, o de n autro riedo che, can che an carabinier i à domandà parcé che l fasesse così fadìa a portà al darlìn, al i à respondù che l era pien de piere: can che i à vardà ize, al darlìn l era pien de bonbes a man; e anche che ize al so taulà, sconto sote l fen, i carabinier i aea ciatà doi cuintai de tritolo! In chel auton ei scominzià a di a scola a Cortina col treno; apede me, l era anche tante riede da San Vido e da Guodo. Cuasi dute pi vece de me, parcé che, durante la guera, la scoles medies les era serades.

L albergo ”Ampezzo” de Cortina l era stà recuisì dai americane. L era pien de soldade che, dato che la guera l era fenida, i no aea autro da fèi che aspietà solo de tornasseno a cesa soa, in America.

Sul treno aon cognossù an on da Pozales che lauraa par i americane, e chesto on al me à domandà se podeane i ciatà pistoles e s-ciope, che al me i avarae pagade polìto. I americane i era pies de schei (amlire, solde taliane scrite su par inglese che servia a pagà la “truppa d’occupazione”) e i era come mate par podé portasse in America armes todesches.

Ió no me èi fidà, ma doi riede da Borcia i à dito de sì e in Vilanuova i à ciatà duto chel che ocorea. Par an bel toco l é duda inavante così: chel riedo da Vilanuova al tiraa mile franche par na pistola e doimile par an s-ciopo Mauser. Chel on da Pozales al pagaa a chi riede zinchemìle par na pistola e diesmìle par an s-ciopo.

Cuanto che el al ciapaa dai soldade nessun al saea. Credo che al se aprofitasse an tin massa parcé che an dì èi intivà a vede che al soldà al i à dà na botìlia de bira de duta forza ize par na ganassa. Da in chel dì l era feni la cucagna.

Se i americane no saea come spende i schei, nosautre faseane fadìa a dì inavante e par chesto me resta inpresso ce che suziedea sul treno da bonora e dadassera: chi riede che aea vendù s-ciope e pistoles, i aea scominzià a duià a poker. Daspò, can che chi da Cortina i à sentù udor de schei, in poco tenpo i à magnà fora duto. Vede girà la cartes da mile ize man de riede de cuìndes ane, co la miseria che l era in giro! Daspò de n per de mes l era fenì duto: comercio e schei! L é proprio vero, come che disea chi vece, che i solde ciapade zenza fadia, come che i ien i và.

(Borcia)