Fabulae (Avianus)/XLII

E Wikisource
(Redirectum de Fabulae (Avianus) - XLII.)
XLII - De lupo et haedo
Saeculo IV

 XLI


 [DE LUPO ET HAEDO]

Forte lupum melior cursu deluserat haedus,
Proxima vicinis dum petit arva casis;
Inde fugam recto tendens in moenia cursu
Inter lanigeros astitit ille greges.
Impiger hunc raptor mediamque secutus in urbem,
Temptat compositis sollicitare dolis:
"Nonne vides, inquit, cunctis ut victima templis,
Inmitem regemens morte cruentet humum?
Quod nisi securo valeas te reddere campo,
Heu mihi! vittata tu quoque fronte cades."
Ille refert: "modo quam metuis, precor, exime curam,
Et tecum viles, improbe, tolle minas;
Nam sat erit sacrum divis fudisse cruorem,
Quam rabido fauces exsaturare lupo."
Sic quotiens duplici subeuntur tristia casu,
Expedit insignem promeruisse necem.

 XLI