Pœù seguiti: Te diset che a l’inferna
Eneja l’è andaa giò vestii e colzaa
Minga in sogn, nè per stagh nanca in eterna?
Mi el credi; ma sont cert che se ’l gh’è andaa
Minga ai sò meret l’ha concess l’Eterna
Ma a quij de la soa gran posteritaa:
Inscì anch nun femm la cort a ona rabbiosa
Mamma veggia e insofribel per la tosa.
De fatt s’è vist col temp ciar comè on specc
Che sto Eneja l’è minga vegnuu al mond
Per destrugà di micch comè parecc,
Ma che dal sapientissem e profond
Ingegn de quell che stà de sora i tecc,
L’è staa creaa per el sò fin segond,
Idest perchè de lù nassa chi sappa
Fondà Roma e on bon regn de god el Pappa.
Per sto viacc che t’ee scritt con tant ingegn
L’ha savuu ch’el doveva avè vittoria;
Per quest l’ha combattuu, l’ha quistaa on regn
Prenzipi al Pappa e a lù de tanta gloria,
E se d’andà al terz Ciel no l’è staa indegn
Sant Paol anca lù bonna memoria,
L’è staa per portà indree de quij notizi
Che ten lontan i fedel dal prezipizi.
In sul fà di Franzes del temp present
Che, dopo avè struppiaa parice nazion
Per rendij come lor indipendent,
Cambien tre vœult a l’ann costituzion
E distruggen tutt coss in d’on moment,
Me sont cambiaa ancamì d’opinion;
Prevals infin tra tanc penser e intrigh
Quell de salvà la panscia per i figh.
