 |
Questa pagina è stata trascritta, formattata e riletta. | |
| LA PUTTA ONORATA | 421 |
Catte. La nostra casa xe deventada una galarìa. Sempre antigaggie.
Pantalone. Cossa feu, fie mie, steu ben?
Bettina. Mi stago ben, e ela?
Pantalone. Cusì da vecchio.
Catte. Caro sior Pantalon, nol diga sta bruta parola. Lu vecchio? S’el par un omo de quarant’ani! In verità ch’el fa vogia, el consola el cuor. Giusto adesso disevimo ben de elo. Certo no gh’ho lengua bastante de lodarme de la so carità. Se nol fusse elo, poverete nu. Mio mario no vadagna. I vadagni de le done se sa cossa che i xe. No me vergogno a dirlo, ancuo no savemo come far a disnar. El ciel l’ha manda. Sìelo benedetto! Me dónelo gnente?
Bettina. (Che gaìnaa! Oh che finta!) (da sè)
Pantalone. Cara fia, dove che posso, comandeme; savè che lo fazzo de bon cuor; tiolè sto mezzo ducato, andeve a comprar qualcossa.
Catte. El cielo ghe renda merito. La resta servida, la se comoda. Betina gh’ha da parlar. Vago a comprar una polastra. Bondì a vussustrissima. (Per mezzo ducato se pol far manco che minchionar un vecchio?) (da sè, parte)
SCENA X.
Pantalone e Bettina.
Pantalone. (Sta donna va via e la ne lassa soli. Vardè che poco giudizio. Sta putta no la sta ben in sta casa; ghe remedierò mi). (da sè)
Bettina. Xelo straco? Che el se senta.
Pantalone. Sì ben, fia mia, me senterò; senteve anca vu.
Bettina. Sior sì; farò la mia calza.
Pantalone. Eh, no importa che laorè. Senteve qua e parlè un pochetto con mi.
- ↑ Scozzonata.
