Pagina:Pitrè - Canti popolari siciliani I, 1891.djvu/237

DESIDERIO, SPERANZA

211

Ca idda voli a mia, e jeu vogghiu ad idda,
Li so’ parenti ’un mi la vonnu dari;
Tant’haju a fari, ’nsina ch’haju ad idda,
Ca jeu, pi tantu, ’na morti haju a fari ¹. (Cefalù).

*

78. O bedda, bedda, mèttiti ’n pinseri,
Li to’ biddizzi a cu’ li voi lassari;
Nun li lassari a qualchi baratteri,
Ca ti li cància pr’un tozzu di pani;
Lassali a mia, ca su’ l’arginteri,
E ti li sarvu ’nta li marzapani ²;
Poi ti li nèsciu li festi sullenni,
Quannu veni la Pasqua e lu Natali. (Montemaggiore).

*

79. Sugnu vecchiu ohimè! sempri aspittannu
Comu li Patri Santi a lu Misia;
Spera d’aviri a vui, nun sàcciu quannu,
L’ura e lu jornu chi cuntenti sia;
Ora passò lu misi, e vinni l'annu,
Mi scantu si vutati fantasia ³.
Nun mi nni curu no sempri aspittannu,
Si fussi certu ca fòravu mia! ⁴ (Cefalù).

*

1. Tanto, una volta io ho da morire.
2. Marzapani, plur. di marzapanu, scatola.
3. Temo che mutiate pensiero.
4. Non mi curo se starò sempre ad attendervi, purchè io sia certo che voi sarete mia.