Pagina:Pitrè - Canti popolari siciliani I, 1891.djvu/242

216

CANTI POPOLARI

*

90. Fuocu chi m’ardi spissu di cuntinu,
Mi firisti lu cori, e cchiù ’un è sanu;
Tràsiri cci vulia ’nta ssu jardinu,
Zappari comu fussi un urtulanu;
’Nta ssu pittuzzu cc’è lu gesuminu,
Cògghiri iu vulia cu li me’ manu;
E jeu, lu puvireddu e lu mischinu,
Sentu l’oduri e nni sugnu luntanu. (Cefalù).

*

91. Amuri, chi la sprânza mi manteni,
Accura ’un pigghi quarchi variuni¹;
Io ti taliu cu ll’occhi sireni,
Ca ti starria davanti addinucchiuni.
Bedda, ca nun sapiti li me’ peni,
Ed anchi quant’è granni lu mè amuri;
Nenti mi servi vulìriti beni,
Cà t’amu e ’un ni pozz’ essiri patruni. (Palermo).

*

92. — Funtana, ti vurria un pocu spijari²
Si la bedda cci vinni a pigghiari acqua?
— La bedda cci ha vinutu acqua a pigghiari,
Li manu si lavau cu la stiss’acqua.
— Funtana, vidisti lu focu addumari³,
Ed era chi addumava accantu all’acqua?

1. Variuni, svarione, errore.
2. Spijari, domandare.
3. Questo verso dodecasillabo nel canto si riduce alla giusta misura colla fìlalella.