 |
Questa pagina è stata trascritta e formattata, ma deve essere riletta. | |
| SALUTI, DONI | 273 |
D’accantu accantu ci scrivu l'amuri;
E ’nta lu mienzu un’acula riali,
E poi lu stennu ’mmienzu rosi e sciuri:
— ’Sciùcati prestu, cà t’haju a mannari. (Mineo).
*
235. Quannu passu di ccà e nun vi salutu
Nun mi tiniti pi malucriatu,
Cà di la Curti sugnu prusicutu1
Di la mè ’manti sugnu assicutatu.
Si vô’ sapiri quannu ti salutu:
Quannu dormu cu tia ciatu cu ciatu. (Alimena).
*
236. Figghiuzza, chi ’un hai fattu vintun’annu,
L’arma mi nesci e lu cori pi tia,
Nun haju ’mmasciaturi a mè cumannu,
Mancu ’na donna cunfidata mia;
Pigghiati chista littra chi ti mannu,
Ddocu cc’è scritta la pirsuna mia;
Si vôi sapiri pirchì ti la mannu,
Stari nun pozzu cchiù senza di tia. (Palermo).
*
237. Talè chi matinata mi spuntau!
Chista è jurnata di lu mè arricriu.
Cu l'arba a la finestra idda affacciau.
Mi calau la tistuzza e mi ridiu;
Un pumu muzzicatu mi jittau,
"Mancialu, dissi, pri l'amuri miu.„
Ma nun fu pumu no, chi mi dunau,
Fu ’na vampa di focu, chi m’ardiu. (Raffadali).
- ↑ Perchè son perseguitato dalla Giustizia.
