 |
Questa pagina è stata trascritta, formattata e riletta. | |
| 24 | lo cunto de li cunti |
tornaje a dire: «Attienne a servire noratamente, ca sarrimmo de convegna, e farraje lo buono juorno.» Accossì, concruso sto parentato, Antuono restaje a servire l’uerco; dove lo magnare se jettava pe facce, e, circa lo faticare, se steva da mandrone1; e tanto che, nquattro juorne, se fece Antuono grasso comm’a Turco, tunno comm’a boje, ardito comm’a gallo, russo comm’a gammaro, verde comm’aglio e chiatto comm’a ballena2, e cossì ntrecenuto e chiantuto3, che non ce vedeva. Ma non passaro dui anne, che, venutole nfastidio lo grasso, le venne golio e sfiolo granne de dare na scorza a Pascarola4, e, pensanno a la casarella soja, era quasi trasuto5 a la primma spezie. L’uerco, che vedeva le ntragne6 soje e lo canosceva a lo naso lo frusciamiento7 de tafanario8, che lo faceva stare comm’a chelleta9 male servuta, se lo chiammaje da parte e le disse: «Antuono mio, io saccio ch’aje na granne ardenzia de vederele carnecelle toje; perzò, volennote bene, quanto le visciole10 meje, me contento che ce dinghe na passata, e agge sto gusto. Pigliate, addonca, st’aseno, che te levarrà la fatica de lo viaggio; ma sta ncellevriello, che no le decisse maje: Arre, cacaure!, ca te piente, pell’arma de vavomo!» Antuono, pigliatose lo ciuccio, senza dire bon vespere, sagliutole ncoppa, se mese a trottare. Ma n’avea dato ancora no centanaro de passe, che, smontato da lo sommarro, commenzaje a dire: Arre, cacaure!. E aperze apena la vocca, che lo sardagnuolo commenzaje a cacare perne, rubine, smeraude, zaffire e diamante,
- ↑ Poltrone.
- ↑ (EO) ballana.
- ↑ Tarchiato e colla pelle tesa.
- ↑ Casale nel territorio Aversano; ora frazione di Caivano. Ma sembra una svista, e che volesse dite: Marigliano.
- ↑ Entrato.
- ↑ Viscere; spagn.: entranas.
- ↑ Molestia, prurito.
- ↑ Deretano
- ↑ Cosa, faccenda. E si adopera, quando non soccorre la parola precisa.
- ↑ Pupille
