Pagina:Basile - Lu cunto de li cunti, Vol.I.djvu/245

Da Wikisource.

jornata i. trattenemiento i. 31

de lo sinno1, e saccio quanta para fanno tre buoje; no so chiù peccerillo, ca chi vo gabbare Antuono se vo vasare lo guveto2!» A chesto respose l’uerco: «L’opera lauda lo mastro; le parole so femmene, e li fatte so mascole; starrimmo a lo bedere! Tu m’aje ntiso chiù de no surdo: ommo avvisato è miezo sarvato!» Mentre l’uerco secotejava a dire, Antuono se la sfilaje verzo la casa: ma non fu miezo miglio descuosto, che disse: Auzate, mazza. Ma no fu parola chesta, ma arte de ncanto, che subeto la mazza, comme se avesse auto scazzamauriello3 dinto a lo medullo, comenzaje a lavorare de tuorno4 ncoppa le spalle de lo nigro Antuono, tanto che le mazzate chiovevano a cielo apierto, ed uno cuorpo n’aspettava l’autro. Lo poverommo, che se vedde pisato e conciato ncordovana5, disse subbeto: Corcate mazza; e la mazza scacaje6 de fare contrapunte sopra la cartella de la schena. Pe la quale cosa, mezzato7 a le spese soje, disse: «Zoppo sia chi fuje!; affè ca no la lasso pe corta!; ancora n’è corcato chi ha d’avere la mala sera!» Cossì dicenno, arrivaje a la taverna soleta, dove fu recevuto co la chiù granne accoglienza de lo munno, perchè sapeva che zuco renneva cotena. Subeto che Antuono fu arrivato, disse all’oste: «Té, stipame sta mazza; ma vi, che no decisse: Auzate, mazza, ca passe pericolo! ntienneme buono, no te lamentare chiù d’Antuono, ca io me ne protesto, e faccio lo lietto nante!» Lo tavernaro, tutto prejato de sta terza ven-



  1. Dente del senno.
  2. Gomito.
  3. Piccolo demonio, diavoletto, piuttosto benigno.
  4. Tornio.
  5. «Siccome la pelle di cordovana per divenir più gentile nella sua concia, passa per tormenti maggiori d’ogni altra pelle.» Così Partenio Tosco (L’eccell. della lingua napol., p. 266).
  6. Cessò. Metaf., al solito, da cosa poco pulita.
  7. Istruito.