Pagina:Basile - Lu cunto de li cunti, Vol.I.djvu/405

Da Wikisource.

jornata ii. trattenemiento ii. 191

do li pescetielle, la pecora de lo sale, e l’aseno della vrennata1, disse a la mogliere: «Lassala trasire la poverella, chè, se dorme ncampagna, porria essere guastata da quarche lupo!» E tanto disse, che la mogliere l’aperze la porta, ed isso, co sta carità pelosa, fece designo de faresenne quattro voccune. Ma no cunto fa lo gliutto, e n’autro lo tavernaro! Perchè, essennose buono mbriacato, e puostose a dormire, Nella, pigliato no cortiello da coppa no repuosto, ne fece na chianca; e, puosto tutto lo grasso a n’arvariello2, s’abbejaje a la vota de la corte. Dove, presentannose nanze a lo re, s’offerze de sanare lo prencepe. Lo re, co n’allegrezza granne, la fece trasire a la cammara de lo figlio. Dove, fattole na bona ontata de chillo grasso, nditto nfatto3, comm’avesse jettato l’acqua ncoppa lo fuoco, subeto se chiudettero le ferute, e deventaje sano, comme no pesce. La qualmente cosa vedenno lo re, disse a lo figlio: «Chesta bona femmena meretarria la remonerazione prommessa pe lo banno», e che se la pigliasse pe mogliere. Lo prencepe, sentenno chesto, respose: «Da mo se pò pigliare lo palicco4!, ca non aggio ncuorpo quarche despenza de core, che ne pozza dare a tante; già lo mio è ncaparrato, ed autra femmena n’è patrona!» Nella, che sentette chesto, respose: «Non te deverisse «allecordare de chella, ch’è stata causa de tutto lo male tujo». «Lo male me l’hanno fatto le sere, — leprecaje lo prencepe — , ed esse ne deveno5 cacare la penetenzia!» «Tanto che le vuoi propio bene?», — tornaje a dicere Nella. E lo prencepe respose: «Chiù de ste visciole». «S’è cossì6 — repigliaje Nella — , abbracciame, strigneme, ca io so lo fuoco de sso core!»



  1. Intriso di crusca ed acqua, che si dà per cibo ai cavalli o agli asini.
  2. Vasetto, alberello.
  3. Detto fatto.
  4. stuzzicadenti
  5. (EO) deveva.
  6. (EO) e cossì