Pagina:Basile - Lu cunto de li cunti, Vol.I.djvu/463

jornata ii. trattenimiento viii.

249

vita; essenno serpe, che mosizeca, carola, che roseca, fele, che ntosseca, neve, che nteseca, chiuovo, che smafara, sparte-matremmonio de li guste d’ammore, scazzella-cane¹ de li contente amoruse, e continua tropeja ne lo mare de li piacire de Venere; la quale mai sguigliaje cosa de bene, come confessarrite co la lengua vostra, sentenno lo cunto, che secota.

Era na vota lo barone de Servascura, che, avenno na sore zita, la quale sempre jeva coll’autre giuvane de l’età soja a sautariare pe no giardino, e trovanno fra l’autre vote na bella rosa spampanata, facettero nguaggio, che chi la sautasse netta, senza toccarele na fronna, guadagnasse no tanto. E, sautannoce na mano de femmene cavallune pe coppa, tutte ce morravano, e nesciuna la scarvaccava netta. Ma, toccanno a Lilla, ch’era la sore de lo barone, pigliato no poco de vantaggio arreto, dette na tale corzeto, che sautaje de posole pe coppa la rosa. Ma, facennone cadere na fronna, fu cossì accorta e destra, che, pigliannola fra lumme e lustro² da terra, se la gliottette³, guadagnanno lo nguaggio. Ma non passaro tre juorne, che se sentette prena; de la quale cosa appo a morire de dolore, sapenno cierto de n’avere fatto mbroglie, nè vescazzie⁴, nè le poteva cadere mente, comme le fosso ntorzata la panza. Pe la quale cosa, corze a certe fate ammiche soje, le quale le dissero, che non dobetasse, ca era stata la fronna de rosa, che s’aveva gliottuta. Lilla, sentuto chesto, attese a nasconnere quanto potte la panza, e, venuta l’ora de scarrecare lo pisemo, figliaje secretamente na bella fegliola. A la quale puosto nomme Lisa, la mannaje a le fate. La quale, ogn’una le dette la fatazione soja; ma l’utema de chelle, volenno correre a vedere sta peccerella, sbotatose desastrosamente

---

1. Propr.: chi molesta i cani, che amoreggiano per le vie.
2. Senza esser vista.
3. Inghiottì.
4. Disonestà.

32