 |
Questa pagina è stata trascritta ma deve essere formattata o controllata. | |
| Märchen | 635 |
254. Ei enzitgi malseuns e san ils docters bucca giadar, sche dei ins schar vegnir ora in tschadun saun, ira tier in pegn, far ina rusna en quel e derscher il tschadun saun en quella rusna, ch' ins staupa si. Il malseun vegn lura ha vegnir sauns et il pegn vegn pirir vi.
NACHTRÄGE.
Märchen.
104. Ils treis legns cun l' ossa.
Ei era ina gada in catschadur e quel era jus alla catscha de camutschs. Mo quei di era ei en tschaghera ed il catschadur ha sitau giu in auter catschadur, ch' el ha teniu per in camutsch. Il catschadur steva tribel mal; mo fatg ei fatg ed el saveva nuota midar.
En quella tiara commondava ina regina e quei era ina stria. La regina ha schau far ord il tgau dil catschadur, ch' era vegnius sitaus, in naschier, ord las combas in sessel e cul tgil in spieghel. Allura ha la regina schau clomar il catschadur, che haveva sitau giu lauter catschadur senza fraut ed ha mess avont ad el il naschier, il sessel ed il spieghel. „En in onn ed in di,“ ha la regina detg al catschadur: „stos ti saver dir, de tgei quei naschier, quei sessel e quei spieghel ein fatgs. Sas ti buca lignar, sche lasch jeu metter tei vid la fuortga. Sas ti lignar, sche vegn jeu vid la fuortga.“ Il catschadur ha mirau ditg sin il naschier, il sessel ed il spieghel; mo quei gidava buca bia; el podeva buca vegnir sisu, de tgei ei fussen fatgs.
Tut trests ha igl umm priu fest e fagott ed ei se mess sin via per mirar, tgi savess dir ad el, ord tgei il naschier, il sessel ed il spieghel fussen fatgs. Igl umm ei jus ditg pil mund entuorn; mo ni prers ni signurs havevan cussegl e remiedi per el ed in onn ed in di eran gleiti entuorn. Ina gada, ch' el mava tras in uaul, ha el viu ina terribla tauna. E perquei, ch' ei fagieva macort' aura, eis el jus en quella per haver suost. El ha entschiet ad ir della tauna giu ad en ed ei jus in toc el stgir, entochen ch' el ei vegnius tier ina gronda porta lenn. Sper quella era in tgaun ner, che durmeva. Igl umm ha aviert quella porta ed allura ha il stgir calau si ed el era el stgir e clar. La porta ei se sarada cun in plum ad el sils calcogns. Mo il catschadur ha nuota temiu ed ei jus in brav toc viaden. Allura eis el vegnius tier ina termenta porta de fier e sper quella era in tgaun ner, che durmeva.
