 |
Questa pagina è ancora da trascrivere o è incompleta. | |
| 646 | Märchen |
fin entaupa Niessegner ina femna. Era quella damond' il Segner, tgei ella desiderassi, ch' el dessi ad ella? „Bien e biala veta,“ leva la femna. Mo il Segner ha stoviu rispunder, quei sappi el buca dar. „Ach miarda,“ di la femna tut malidia. „Sche quei deigis ti ver,“ di il Segner, ed omisdus van per lur vias.
115. Il spus miert.
Ei era ina gada in giuncher, che leva maridar ina paupra matta; mo ils ses gieniturs levan buca schar maridar el quella paupra e dustavan, tgiei ch' ei podevan. Il giuven ha s' empermess cun la giuvna, ha dau ad ella ina dubla sin la letg e detg, el vegni tal - a - tal di per ella e meini ella a casa sia, nua ch' ei fetschien nozzas. Ils ses gieniturs han aber fatg ton mitgiert cun il giuven, ch' el ei morts della malenconia. Mo la spusa saveva nuot, ch' el fuss morts. La sera dil di, ch' el veva empermess, ei il spus vegnius a cavagl cun manti si avon la casa della spusa. El ha clomau ella ord casa e detg, ella deigi se metter sin cavagl cun el. Il spus ha domondau la spusa, sch' ella temi buc. „Jeu temel buc, cu jeu sun cun tei,“ ha la spusa respondiu. Il spus ha lura scurentau il cavagl el sonteri dil vitg, nua ch' el era, ei seglius giu en ina fossa aviarta ed ha voliu trer giu en quella il cavagl e la spusa. La spusa ha aber tschintschau cul cavagl e podiu fermar quel. Enaquella ha ei tuccau de stizzar ed il spus ei svanius en la fossa. La matta ha priu il cavagl, ei ida avon la casa dil spus ed ha laventau si ils ses gieniturs. Quels ein stai surstai e cura che la matta ha raquintau, co il spus seigi vegnius per ella e co el levi trer ella en la fossa, ein ei vegni tribel tementai. Els ein i cun la matta en sonteri ed han anflau la fossa dil figl aviarta. Suenter haver curclau giu la fossa cun terratsch, han ei fatg vegnir la matta a casa e detg ad ella, ella sappi viver da cheudenvi de signura cun els. La matta ei da leu daven stada sc' ina signura en lur casa, ella bueva vin e magliava paun alv.
116. Las tschereschas neras.
In bab haveva treis figls. Quels eran gronds e bials giuvens. Dus eran loschs e maltschecs cun autra glieut, il giuven era buns e pulits cun tutta glieut.
En quella tiara era in retg, che haveva ina soleta figlia. Quella ei vegnida grevamein malsauna. Il docter ha declarau, la figlia sappi mo lu vegnir sauna, sch' ella magli tschereschas neras. Ed il retg ha empermess la figlia a tgi, che porti tschereschas neras. Il bab cun ils treis figls haveva in tscharscher, che portava tschereschas neras da miez unviern. Il bab pren giu ina canistralla de quellas tschereschas e dat ellas al figl vegl, ch' el porti ellas al retg sco medischina per sia figlia. Il giuven ha priu las
