 |
Questa pagina è ancora da trascrivere o è incompleta. | |
| Sagen | 653 |
crapp encorsch' ins aunc ils calcogns, il tgil, il tgau e las caultschas dil giavel.
90. Il crapp de Salischina.
Sin l' alp de Salischina ei in ualti gron crapp cun duos rusnas, ch' ei mass grad en in schanugl. Sin quell' alp era ina gada in fetg pietus umm, che stev' adina enschanuglias sin quei crapp e scheva paternos. El ei staus aschi ditg e schi bein, che sias schanuglias han fatg en las duos rusnas el crapp.
91. Il crapp Tschalarer.
Ualti giudem las aclas de Breil ei in ault crapp tut isolaus d' auters. Leu se redunavan1 las Tschalareras; perquei numn' ins el il crapp Tschalarer.
92. Il crapp de sogn Valentin.
A Pigneu mussan ins aunc il crapp de sogn Valentin. El schai bucca da lunsch sur la baselgia de sogn Valentin en ina muschna.
Cura che sogn Valentin ei vegnius sur quolm a Pigniu, ha el entschiet ha pardagar. Mo la glieut leu era marcladira de pagauns. Sogn Valentin ei vignius in di vilaus et ha detg: „Jeu vi mussar, che quei, che jeu digiel, seigi ver. Ei glei ver aschi franc, sco jeu passel cun mes peis en quei crapp, sin il qual jeu pretgial.“ Et el ei passaus culs peis el crapp, ch' ins encorscha aunc oz ils fastitgs.
93. Il crapp dils Tirrans.
Damaneivel della vischnaunca de Ruschein, sut il crest della ruina Fronschberg ei ina platta cun in per rusnas tagliadas ora sco cuppas. Ord quellas magliavan ils tirrans lur suppa, cura ch' ei berschavan la caltschina, per baghiar il casti de Fronschberg.
94. Il crapp dellas strias.
Sur la vischnaunca de Ruschein ei in grond crapp, che se pusa sin ina platta, sco sch' el fuss tchentaus leu alla posta. Quei crapp havevan las strias runau ina notg giu dal quolm e vulevan ruclar el giu sin la vischnaunca. Ellas fagievan teribla prescha e clomavan ter ina lautra: „Fistgenei, fistgenei, avon che Gieri, Gioder e Rumetg berlien.“ Mo ei ha tuccau de stizzar, avon ch' ellas havevan finiu ed ei han stoviu schar il crapp sin la platta.
95. Il crapp de Cuflons.
En la vall de Cuflons s' anfl' in crapp, sil qual las strias vegnan mintgamai … a saltar. Glieut naschida dis de quatter tempras han schon viu trentaquatter pera a saltont sin il crapp, ch' ei per schiglioc nuot a parti gronds.
- ↑ ed. redunavau
