Pagina:Decurtins - Rätoromanische chrestomathie, VIII.djvu/620

Da Wikisource.
Jump to navigation Jump to search


Guardè l' infaunt, cu ch' el ho pêsch e nun vain molesto, e pensè cu ch' el ais pover; perche el nun so che cha que voul dir: ster sün sieu post cun l' arma in maun, combattand con curaschi, fand frunt cun constanzia ad ogni inimih, fin cha spunta la damaun da nouva victoria, fin cha las sommiteds dellas muntagnas vicinas s' indoreschan dalla glüsch dell' aurora … d' ün nouv di. — Guardè l' infaunt, cu ch' el ho avuonda, uschè cha nun al mauncha ünguotta, e pensè cu ch' el ais pover; perche el nun so nouvas dels pü ots e senchs desideris dell' orma umauna, chi la portan our, acciò ch' ella s' acquista guadagn, as mettand se stess nel servezzan dellas pü otas miras del reginam spirituel e servind a prô dellas millieras, chi salvan ils senchs comandamaints; guardè l' infaunt, cu ch' el giova … ed ais containt da sieu gö, e pensè cu ch' el ais pover, perche el nun so nouvas da quel sentimaint da satisfacziun, chi oza l' umaun uschè ot sur la terra e sieus plaschairs, sch' el so d' avair fat sieu dovair e complieu si' ouvra cun conscienziusited.

… Guardè l' infaunt, cu ch' el ais rich, e pensè cu ch' el ais pover; perche el nun so che ch' el ho, l' ais lo sainz' imsüra; nun po imsürer e nun so apprezier il megl ch' el posseda. El ho bger — ed in ultim auncha uschè poch. Ed uossa dimena guardè eir la spia plain furmaint; … cu ch' ella inclina sieu cho, guardand vers la terra e spettand la farcla, siand temp da raccolta. Guardè l' umaun, chi ho vivieu! Forsa ch' el voul fer frunt alla vegldüna ed esser quel da pü bod. — Ma vus cognuschais bgers exaimpels dall' istoria dad umauns, chi haun grazia a lur capacited ed energia surpasso bgers oters — scu per exaimpel quel ferm e guerresc Bismarck — la generaziun pü giuvna il chatscha d' üna vart: ma forsa ch' els stess saintan cha lur forzas vaun sensibelmaing almain e cha las bain varias e diversas gravezzas dell' eted avanzeda vaun sensibelmaing … creschind: Quaunt sula e trista ais la fin in paragun al glüschaint principi? — Ah, laschè cha l' umaun signurescha ün momaintet sur la sort da sieus ultims dis, siand ch' el avess dovieu dvanter lotiers pü capabel, e ch' el s' algorda a que ch' el ho arvschieu ed ais dvanto. Chi so quaunts dis d' indisturbeda sandet ch' el arvschet dal maun donatur, chi so quaunta lavur chi füt incoruneda da bun success; quaunts bels momaints e bellas liras, ch' el passantet in sia famiglia u raccogliet da sia vocaziun, e dals buns cussagls e dals buns pleds — and sun uschè bgers intraunter ils umauns, cha' d ais surabundanza, cha fich bgers paun ir pers, sainza cha qualchün piglia dan — ma chi so che ün da sieus buns pleds, chi ho piglio risch ed ais scu ün' amabla fluretta zoppeda ed incontschainta, chi però dad an ad an porta il bottun e sia flur e sieu sem; e da sias bunas ouvras aunch' uschè pitschnas, chi so in che möd cha faun part d' üna benedicziun stabla, chi vo saimper creschind, chi leiva scu ün solagl amiaivel …