Pagina:Decurtins - Rätoromanische chrestomathie, VIII.djvu/622

Da Wikisource.
Jump to navigation Jump to search


Pensè dimena che cha l' umaun so uossa, da que ch' el nun savaiva üna vouta, que ais chosa tuottaffat grandiusa; pensè allas scopertas ch' el fet, allas invenziuns, missas nel servezzan del public in noss dis, a quellas bgeras uschè müravgliusas e custaivlas invenziuns; pensè allas ouvras del spiert umaun, chi augmentet sias abiliteds, allas grandiusas ouvras della literatura mundiela, dell' arte: sculptura e musica. Scha' s piglia que insembel, … schi ais que chosa granda ed imposanta. — Ma pensè bger pü a que cha l' umaun ais dvanto nel cuors dels seculs. Am pera, cha nun as possa esser in dubi: L' ho supero ils costüms rozzos; que chi eira üna vouta generelmaing admiss, ais uossa be pü ün abomini nel sentimaint da tuots nöbels umauns: si' orma ais dvanteda pü sensibla; l' ais — l' umaun — progredieu ün pô pü fop nel immens reginam spirituel, so megl disferenzier ed apprezier qui chi ho stabla valur. — Insomma: l' ais dvanto pü umaun, ad onta da tuottas burrascas, chi' s s-chargettan sur sieu cho, e da tuottas provas da chadagner sieu spiert e sentimaint alla terra.

La spia as madüra! Que stovains dimena piglier in ögl: quaista ledscha del svilup dell' umanited; e nus stovains ans dumander, dinuonder ch' ella vain e cu ch' ella saja: buna e sabia u sainza mira e valur? Ed in quel grô scu cha' ns rendains quint da quetaunt, inclegiarons, perche cha dains l' onur al Dieu della raccolta, perche cha l' orma umauna … s' eleva tar el cun ingrazchamaint e' l clama patrun del tschêl e della terra! Schi, Dieu vöglia, cha possans cun cour grat ans algorder a sia bunted üseda vers nus, e cun tels sentimaints ans approssmer a sia maisa, al dand lod.

Amen.