„Ti merettas bein censura,
Muossas aschi pauc premura!“—
O sin via la canera
Vegn udida quella sera 1175Dal signur, che speras vi
Vegn leu si tier siu casti.
Quel enquera fumitgasa,
E va grad en quella casa. —
Il signur dil liug domonda 1180Suenter la rueida gronda.
E la mumma di, surstada:
„O, la buoba, schi hannada,
Fil’il mescal ord las preits,
Datga nuot ni foms, ni seits!“ 1185Tala habla fumitgasa
Il signur giavisch’en casa.
Gleiti vegnan els perina,
Il signur mett’on cuschina
Alla veglia sco pagaglia 1190In bi mun daners de vaglia.
E la giuvna el casti
Sco filier’ei prida si. —
Biara launa ei rimnada
Da plirs onns, aunc buc filada. 1195Sper la roda fa la matta
Cun filar uss in’entschatta.
Mo daveras dun negin
Ella ha e pauc inschin;
Orda maun quei vul buc ir: 1200Ell’entscheiva a bargir!
Dall’anguoscha, cun vusch loma
En agid ell’ussa cloma
Sia tatta, ditg spartida:
„O filiera, tatta Brida, 1205Gida mei, la paupra matta,
Ch’ei filiera plauna, schliatta!“
