 |
Questa pagina è stata trascritta, formattata e riletta. | |
| 488 | ATTO TERZO |
Bettina. Se me trova sior Marchese, povereta mi!
Beatrice. Se siete meco, non ardirà nè men di mirarvi.
Catte. Betina, xestu ti?
Bettina. Oimei! Tremo tuta. Chi è che me menzona?
Catte. No ti cognossi Cate to sorela?
Bettina. Vu sè?
Catte. Son mi, sorela.
Bettina. Oh cara, lasse che ve chiapa a brazzacolo.
Catte. Sì, vien qua che te basa. (si abbracciano)
Beatrice. Chi è questa?
Bettina. Mia sorela.
Catte. Son una dona da ben, sala? Cossa gh’ala paura? (alla Marchesa)
Bettina. Coss’è de Pasqualin? (a Catte)
Catte. Oe, no l’ho gnancora visto. M’ho perso in sta cale, e no so nè dove che sia, nè dove che vaga.
Bettina. Sorela cara, no posso più. Se no lo vedo, muoro seguro...
Catte. Dime, come xela andada?
Bettina. Te conterò. Oh che cossazze!
Catte. E el Marchese?
Bettina. Giusto elo, quel bogia.
Catte. Ghe xe radeghia?
Bettina. In materia de che?
Catte. Se ti m’intendi1?
Bettina. Oh, gnente.
Catte. No xe puoco.
Bettina. Gramarzè2 a sta lustrissima.
Catte. Chi xela?
Bettina. So mugier.
Catte. Oh cossa che ti me conti!
Beatrice. E così, l’avete ancora finita? (a Bettina)
Bettina. Adesso, lustrissima, vegno. E de sior Pantalon?
- ↑ C’è mancamento? c’è che dire?
