 |
Questa pagina è stata trascritta, formattata e riletta. | |
| 526 | ATTO PRIMO |
Bettina. Vare che sesti! L’ho fato mi, siora.
Catte. Uh, che fantolina! Tiolè, via, no pianzè. (glielo dà)
Bettina. Povereto el mio pantalonzin, povereto!
Catte. No ti gh’ha gnanca sesto de tegnir i fioi.
Bettina. La xe la prima volta; imparerò.
Catte. Oe, no ti senti? Bisogna desfassarlo. (fa cenno che sentisi mal odore)
Bettina. Oh sì, in veritae. Momola. (chiama)
Catte. Presto, Momola.
Bettina. Momola, in malorzega.
SCENA IV.
Momola e dette.
Momola. Son qua, siora, son qua.
Bettina. Anca sì che ti gieri al balcon?
Momola. Mi al balcon?
Catte. Sì, che t’ho visto mi, co son vegnua. (a Momola)
Bettina. L’ave vista?
Catte. Seguro.
Momola. Uh che schitonaa. (a Cate)
Catte. Senti sa, baronzela, te darò de le sculazae, sa.
Momola. Marmeo, squaquerà1.
Bettina. Via, via, a monte. Meti a scaldar do pezze, che vogio infassar el putelo.
Catte. Daghelo a ela, che la lo desfazza.
Bettina. Sì ben; seu mata?
Catte. Mo perchè?
Bettina. Una puta volè che lo desfassa? (piano a Cate)
Catte. Oh varè che casi!
Bettina. No, no, in casa mia no se fa ste cosse.
Catte. Ben!
- ↑ Ciancera.
- ↑ «Voce onde canta la quaglia»: Boerio, Diz. cit.
