Pagina:Goldoni - Opere complete, Venezia 1909, IV.djvu/633

IL POETA FANATICO

619

Menico. No ve stupì se la xe andada via,

     Che questa delle donne xe l’usanza,
     Muar¹ sistema nella fantasia,
     E poderse vantar dell’incostanza.
     Diseghe, se la va, bondì sioria,
     Che delle donne ghe ne xe abbondanza.
     No ghe ne manca no de ste mattone,
     Ma pochettine ghe ne xe de bone.
Tonino. Saveu perchè ghe n’è poche de bone?
     Perchè i omeni i xe pezzo de elle.
     L’omo ghe dona el titol de parone,
     E superbe el le fa col dirghe belle.
     Elle, che no le xe gnente minchione,
     Le ne vorave scortegar la pelle;
     Tutte le ne maltratta a più no posso,
     E i pi cazzar nu se lassemo addosso.

SCENA ULTIMA.

Arlecchino e detti.

Arlecchino. Patroni cari, con sopportazion,

     Reverisso el mio caro sior cugnà.
     Un caro portalettere minchion
     De carta certa lettera el m’ha dà.
     Mi che omo fedel e presto son
     L'ho tolta, ve la porto, eccola qua;
     Ve la dago, averzila, e po lezela,
     E per far fazzoletti adoperela. (dà una lettera a Tonino)
Menico. Me consolo con vu, compare caro,
     Che savè poetar all’improvviso. (ad Arlecchino)
Arlecchino. Ogni mattina a poetar imparo,
     E se volè, ve poeterò sul viso.

1. Mutare.