 |
Questa pagina è stata trascritta, formattata e riletta. | |
| I PETTEGOLEZZI DELLE DONNE | 469 |
Anzoletta. Me l’ha dito a mi siora Cate lavandera.
Checca. Siora Cate lavandera?
Anzoletta. Sì ben, giusto ela.
Checca. Oe, la sta qua de casa. Adesso lo so subito.
Anzoletta. Bondì sioria1. Mi no vôi pettegolezzi.
Checca. Vegni qua; dove andeu?
Anzoletta. Mi vago a casa. Se volè la vestina, mandevela a tor. (parte)
Checca. Aspettè, sentì; eh, no m’importa della vestina. Vôi parlar co mia zermana Cate. Oe, ghe seu in casa? (batte alla porta)
SCENA XII2.
Cate e detta.
Cate. Oe, seu vu, zermana?
Checca. Sì ben, son mi.
Cate. Voleu gnente?
Checca. Siora sì; vôi qualcossa.
Cate. Cos’è? Seu instizzada?
Checca. Diseme un poco, siora zermana: cossa seu andada a dir, che mi no son fia de vostro zerman Toni?
Cate. Mi no l’ho dito.
Checca. Sì ben che l’avè dito.
Cate. Via, a chi l’oggio dito?
Checca. A Anzoletta sartora.
Cate. (Oh che pettazza3!) (da sè) Sentì, Checca, mi no digo de no averlo dito; ma no me l’ho inventà.
Checca. Se no ve l’avè inventà, saverè come che parlè.
Cate. Oe, me l’ha dito Sgualda.
Checca. Sgualda? Adesso mo. Voi sentir da dove xe vegnua sta chiaccola.
Cate. Oe, mi no voggio pettegolezzi. (va in casa)
Checca. Sgualda. (batte)
