![]() |
Questa pagina è stata trascritta, formattata e riletta. | ![]() |
178 | ATTO TERZO |
Tonina. Ma come mia?
Giulia. Gieri mattina sior Todero l’ha comprada da mio mario.
Tonina. Mo no xe quella ch’aveva la vedova al Redutto?
Giulia. Siora sì. La indovina mo? Credeva che ghe l’avesse donada mio mario, e ghe l’ha donada sior Todero.
Tonina. Mio mario gh’ha donà sta scatola?
Giulia. Siora sì. Pala largaa.
Tonina. Chi ghe l’ha dito, siora Giulia?
Giulia. Me l’ha dito sior Boldo. (s’alza)
Tonina. Ah sassin! A mi el me brontola do soldi de aghib e culìa le scatole d’arzento?
Giulia. Manco mal che giersera m’ho intivàc a véderla. Se no giera mi, la giera itad.
Tonina. Chi sa quanta roba che la gh’ha magnà.
Giulia. La senta, no digo per metter mal, ma gieri, co l’è andà da culìa, gh’aveva un bon fagotto sotto el tabarro.
Tonina. Oh poveretta mi! Siora Giulia, cara ela, no la me sbandonae.
Giulia. Son qua, siora Tonina, con tutto el cuor, fia. Si in verità, dove che posso, la favoriròf.
Tonina. La se vesta e la vegna co mi.
Giulia. Dove, vissere?
Tonina. Da mio compare.
Giulia. A cossa far?
Tonina. A dirghe tutte le belle procedure de mio mario. A contarghe tutto de culìa. Ela che gh’ha più spirito de mi, la ghe conterà più pulito. Cara siora Giulia.
Giulia. Siora sì, andemo. Cussì me desgosseròg un pochetto anca mi.
Tonina. E disemoghe tutto pulito.
Giulia. La lassa far a mi, siora, la sentirà. No ghe lasserò fora un ette.