Pagina:Goldoni - Opere complete, Venezia 1911, XIII.djvu/501

Da Wikisource.

L'AMANTE DI SÈ MEDESIMO 445
Conte. Osservaste, che a tavola non mi ha guardato in viso?

Alberto. Ho visto, e m’è arrivada sta cossa all’improvviso.
Da chi vienla, compare?
Conte.   Zitto, nessun mi ascolta.
Dubito io d’averlo il torto questa volta.
Alberto. Contemela, diseme; son qua, se gh’è bisogno....
Conte. Oh, non vi dico niente.
Alberto.   No? perchè?
Conte.   Mi vergogno.
(ridendo, e parte)

SCENA IV.

Il signor Alberto.

El ride, el se la gode, ghe par divertimento

Far desperar le putte. Che bel temperamento!
Se mi colla morosa savesse d’aver torto,
E la vedesse a pianzer, sarave mezzo morto.
Delle volte ghe penso, e digo tra de mi:
Coss è quel che diversi fa i omeni cussì?
L’anima xe l’istessa, e pur l’operazion
Dell’anima è diversa per varie inclinazion.
I corpi? No xei tutti formadi d’una pasta?
L’educazion, la scuola? La fa assae, ma no basta.
I organi che forma sta macchina mortal,
Xe quelli che produse diverso el natural.
No digo za che i sforza le operazion del cuor,
Ma i xe i principi veri del sdegno e dell’amor.
Lo so che la rason comanda da regina,
E alle passion resiste, dove la forza inclina;
Ma un omo che abbia fervido el sangue in ogni vena,
A superar la collera el sentirà più pena.
E un altro che no sia de fibre ben complesso,
El sarà per natura pacifico in se stesso.
E mi, che gh’ho le vissere che a tenerezza inclina,
Bisogna dir che gh’abbia le fibre de puina.