 |
Questa pagina è stata trascritta, formattata e riletta. | |
| UNA DELLE ULTIME SERE DI CARNOVALE | 143 |
Domenica. Ghe vorla veramente ben a sior Agustin?
Elenetta. Se ghe veggio ben? De diana! Se stago un’ora senza de elo, me par de esser persa1.
Domenica. No diseli ch’el xe tanto un bon putto?
Elenetta. Siora sì, dasseno.
Domenica. E i cria donca?
Elenetta. Cossa disela? Se volemo ben, e tutto el dì se magnemo i occhi.
Domenica. A mi mo, védela, sto ben nol me comoderia gnente affatto.
Elenetta. E mi son contenta, che no scambierave el mio stato con chi se sia.
Domenica. La gh’ha gusto a criar?
Elenetta. Crio, ma ghe voggio ben.
Domenica. E lu?
Elenetta. E lu el cria, e el me vol ben.
Domenica. Oh! cari.
Elenetta. Cussì la xe.
Domenica. Chi se contentaa gode.
Elenetta. Mi son contenta, e godo.
Domenica. (Oh siestu! e po te pustu!)b Oh! xe qua siora Marta co so mario.
Elenetta. Chi xeli?
Domenica. No la li cognosse?
Elenetta. Oh! mi no cognosso nissun.
Domenica. I xe marcanti da sea; ma de quelli, sala? che ghe piove la roba in casa da tutte le bande.
Elenetta. Sia malignazo! Gh’ho suggizion. Me vergogno.
Domenica. Eh! via, cara ela; la lassa che la vaga a incontrar.
(s’alza, e va incontro a Marta)
- ↑ Smarrita d’animo.
