![]() |
Questa pagina è stata trascritta, formattata e riletta. | ![]() |
LE BARUFFE CHIOZZOTTE | 57 |
Isidoro. Cossa voleu far? Se laora; bisogna anca devertirse.
Vicenzo. E ghe piase i ninzolettia a siò cogitore.
Isidoro. Orsù, bisogna che vada a spedir b un omo. Stè qua. Se vièn sta zente, disèghe che adesso torno. Disèghe alle donne, che le vegna a esaminarse, che no le gh’abbia paura, che son bon con tutti, e co le donne son una pasta de marzapan. (parte)
SCENA IX.
Vicenzo solo.
Siò sì, el xe un galantomo; ma in casa mia noi ghe bazzega. Dalle mie donne nol vien a far careghetta c. Sti siori dalla peruccad co nualtri pescaori no i ghe sta ben. Oh per diana! Vele quae che le se vie a esaminare. Aveva paura che no le ghe volesse vegnire. Le gh’ha un omo con ele. Ah! sì, el xe paron Fortunato. Vegnì, vegnì, creature, che no gh’è nissun.
SCENA X.
Pasqua, Lucietta, Libera, Orsetta, Checca tutte in ninzoletto. Paron Fortunato ed il suddetto.
Checca. Dove semiof?
Orsetta. Dove andemio?
Libera. Oh poveretta mi! No ghe so mai vegnua in sto liogo.
Fortunato. Parò Izenzo, sioria, parò Izenzo. (saluta paron Vicenzo)
Vicenzo. Paron Fortunato. (salutandolo)
Lucietta. Me trema le gambe, me trema.
Pasqua. E mi? Oh che spasemo che me sento!
Fortunato. Doe xelo e siò cancelliere? (a Vicenzo)