Pagina:Luigi Bauch - ... E sluse in zielo come una speranza..., Zara 1922.djvu/9

Da Wikisource.

OGI, LA STELA, COME UNA PROMESSA...


Rota la resistenza, adio speranza!
Se lassava a ’drio man zità e paese
chi per dover, chi per salvar la panza
Restava Zara per pagar le spese.

Zara, orco can! tignuda su in balanza,
ridota a sgangolir mese per mese,
ma sempre pronta a manezzar la lanza,
e mai disposta a tolerar le ofese.

Unico segno del’antica forza:
el resto san del «Bataglion Rismondo,
che fa la guardia soto un altra scorza.

Unica fede: un nome mai secondo
Dante! che se rinova e se rinforza
e vinze, e vinze sempre in tuto el mondo.


... SLUSE SUL NOSTRO MAR, ILUMINANDO....


Se quà se ingruma la» Dante Alighieri,
stò Congresso el gh’à un fin, e lo capisse
tuti quei là che no xe nati ieri:
no se scominzia, quà, ne se finisse.

No se zioga a panfil, xe afari seri;
s’anca par che le cosse no va lisse,
lassemoghe la barca ai timonieri
che sta mareta no li spaurisse.

Se un giorno ocorarà far la fritaia
i vovi i ghe sarà, sta pur sicuro,
ma quel giorno, orco tron! sara una fraia.

Bevemo intanto a sorsi e muso duro,
no stemoghe a badar se 'l can ne sbaia
e chi che ne vol mal che beva puro.

Zara, 16 Settembre 1922.