|
discorso di chapelain sull’adone |
23 |
de Constitution: et qu’ainsi au lieu de deux expeces il n’y en auroit q’une, contre ce que nous avons conclu; je diray premierement que bien qu’en apparence les Tragedies d’un et d’autre suject semblent n’avoir qu’une seule mode de composition, la chose n’est pas neantmoins si resoluë, pour le stile particulierement, que qui le voudroit examiner jusqu’au fonds ne pust encore trouver quelque diversité entre elles; mais secondement je diray que quand ainsi seroit, la chose, pour ce qui est du traicter, ne court pas esgale entre la Tragedie et l’Epopée; comme ainsi soit qu’en la premiere le Poëte n’a point d’esgard à l’action comme passée en Guerre ou en Paix, ains à elle seule comme ayant un trouble particulier, ce qui fait qu’estant Une pour ce respect, elle ne peut estre traictée que d’une seule maniere; là où en l’Epopée Heroïque la consideration de la Guerre est receuë, mais tellement receuë que sans elle l’Heroïque ne seroit plus Heroïque, entant que le Trouble, qui constituë inseparablement sa nature, n’est vray-semblablement en elle que pour le respect de la Guerre, comme de la source du Trouble et de la confusion; et respectivement en ceste nouvelle espece la consideration de la Paix doit entrer aussi, pour en former inseparablement l’essence, ce qui fera qu’estant double par ce moyen elle desirera double façon de traicter. Mais en un mot, alleguant la Tragedie pour preuve, il m’a deu suffire qu’elle m’ait asseuré du suject de Paix aussi bien que de Guerre; car pour ce qui est du traicter d’iceluy, il est tousjours different selon les differentes considerations que l’on y apporte, et les choses se considerent autrement nües, autrement revestües de necessaires circonstances, comme on le voit par la difference du stile de l’Historien d’avec celuy du Poëte, sur mesmes occurrences et mesmes evenemens. Or, comme la Guerre et la Paix sont remarquables par des mouvemens differens et des circonstances presque opposées, et qu’il soit necessaire de traicter les choses differentes et les opposées par moyens opposez, si la difference considerée comme telle peut constitüer l’espece differente, il n’y a nulle doute que ceste sorte de Poëme, ayant, dans l’estat de la paix qui l’informe, la difference qui la
