E i e moeste.
Dapo de ae camina meso un di i e made inze na zita che r aea gnon
Ciapazibioche. Na ota la, Pinochio l a vedu par strada nossicuante
cianate pelade che i spadeaa da ra fame, feda tondides che es
tremarlaa dal fiedo, pites zenza cresta e zenza bandines che es ’sia
par carita de nafre de sorgo, pavies che no podea pi oujora parceche
i s aea vendu r oujores de mile colore, paoi zenza coda che i se
vargognaa de se mostra e outre ouziei che i tapinaa zenza fei
sussuro e i pensaa a ra so bela penes d arsento oramai par dudes.
Inze par meso sta volmenera de poranimes e petlaroi, in ciou de
tanto passaa carozes de sciore con inze calche volpe o calche jea o un
ouzelato de chi catie.
-El Cianpo dei Miracui, agno elo? - l a damanda Pinochio.
- L e alolo ca.
Dito e fato, i e passade fora par duta ra zita, e de fora dei mure i s a
ferma inze na vara che, suposo, ra i someaa a duta ches outres.
- Son made - ra i a dito ra Volpe al buratin. - Ades insoneete pura
’so, jaa na buja co ra mas e beti inze ra to monedes.
Pinochio l a obedi. L a jaa ra buja, l a betu inze ra monedes che i ea
vanza, e po l a cuerto su ra buja co nafre de tera.
- Ades - ra ’sonta ra Volpe - va ca via da ra ruoia, enpe na sea de
aga e bagna polito ra tera agnoche t as semena.
Pinochio l e ’su via da ra ruoia, e ’sa che l no n aea na sea, el s a tira
fora un scarpo, el l a enpi de aga e l a bagna ra tera che cuersea ra
buja. Dinultima, l a damanda?
- Ebe da fei algo de outro?
- Nuia - ra i a respondu ra Volpe. - Ades podon sin ’si. Torna ca de
vinte menute e te vedaras che l e beleche cresciu su un brascioneto,
coi rame pies de monedes.
59
