Pagina:Pitrè - Canti popolari siciliani I, 1891.djvu/241

AMORE, BACI

215

87. Ssi denti perni e ssi labbra rubbini,
E ssa vuccuzza quannu vui parrati,
Pari ca di lu pettu e di li vini
Lu sangu a stizza a stizza mi tirati.
Biddizzi vui nn’aviti senza fini,
Cu’ vi l’ha datu tanta putistati?
Cá senza ferri, mùffuli¹ e catini
Lu cori di l’amanti ’ncatinati. (Palermo).

*

88. Supra un puntu di roggiu mi firmaju,
Ca ccà m’assettu e ’un vaju avanti cchiui;
È jornu chi pri mia nu scura mai,
Botta pri botta pinsannu pri vui²;
Ora ca ’nta stu pettu vi ’ngastaju,
Lu ciatu e l’arma mia l’aviti vui³. (Alimena).

*

89. Vu’ siti bella e vi vegnu a viriri,
Bella, ca vui siti tanta amata;
Di lu miu pettu nnn putiti ’sciri⁴,
Cà nna lu cori vi tiegnu stampata.
Vi danza⁵ un occiu, e ’n àutru v’arriri,
Aviti ssa vuccuzza ’nzuccarata;
E cu li modi tuoi mi fai muriri,
Unni camini tu luci la strata. (Noto).

1. Mùffuli, manette.
2. Ad ogni colpo dell’orologio pensando a voi.
3. Cfr. Salomone-Marino, n. 151.
4. ’Sciri, uscire.
5. Danzari, danzare. Non si può esprimere meglio il muoversi irrequieto degli occhi della donna.