Questa pagina è stata trascritta e formattata, ma deve essere riletta. |
270 | CANTI POPOLARI |
229. — Sugna vinutu sina a li to’ peri,
Pri sentiri ’a risposta chi mi duni;
Si mi dici di no, mutu pinseri,
Si mi dici di sì, sècutu, amuri.
— Secuta, amuri, com’hai sicutatu,
Nun sugnu donna ca tegnu paura;
Vegna la morti e mi leva lu ciatu:
La spartenza la fa la sepurtura1. (Alimena).
*
230. Comu l’argentu vivu ’un haju abbentu,
Di longu vurria stari a lu tò cantu;
Finiu lu spassu e lu divirtimentu,
Bedda, ppi amari a tia iu patu tantu.
Guarda, siddu mi fannu tradimentu,
Noi semu amici e ’nimicamu tantu;
Ma no, figghiuzza, amamuni ccu ’ntentu,
Ca ’n jornu hâ’ essiri mia tantu pri tantu. (Catania).
*
231. No ’mporta si n’amamu e stamu sparti.
Mentri voli accussì la nostri sorti,
St’occhi fannu funtani ad ogni parti,
Stari luntanu di tia mi pari forti;
Cci voli ’ncegni, sapienza ed arti,
Di spàrtiri st'amuri tantu forti;
Puru ca stamu ducent’anni sparti,
L'amuri sempri t’haju sinu a morti. (Agosta).
- ↑ Spartenza, divisione, allontanamento. Come si vede, è la fusione di due mezzi canti.