Sera anmi on omm grand, gross e scopazzuu,
El respond, ma son mort che l’è lì ajbella1:
Eren Lombard e Mantovan tutt duu
Quij che m’han daa stat, vita e parentella:
Giuli ai mee dì el s’è francaa in man’l cazzuu:
Sott a August galantomm, vera ponzella2,
Hoo vivuu a Roma al temp di dia3 infamm....
....Se no te me fee el nom, te see on salamm.
Vœutt de pu?... Te diroo ch’hoo faa el bosin,
E che hoo scritt on poema, ma sul sciall,
Sora Eneja e el fœugh d’Illi, in vers latin;
E te diroo che voreva anch brusall4
Per ghignon de no avell faa in meneghin.
Ma ti ét traa on buj5 a tornà indree in sta vall,
Inscambi d’andà in scima a la montagna
Dove gh’è el ver paes de la cuccagna?
Oh santissima Vergin del Rosari!
Chi m’avarav mai ditt (esclami fort)
Che in d’on leugh inscì brutt e solitari
Avess de fà on inconter de sta sort!
Tì Vergili, scrittor che no gh’ha pari?...
Tì di poetta onor, lum e confort?
Ah de st’inconter possa avenn profitt,
Almanca per l’amor che hoo avuu ai tou scritt!
Despœù cont el coo bass comè on novizi
Ghe disi rispettos: Ti te sét staa
Quell che m’ha insegnaa a scriv con del giudizi,
E l’è tò se gh’hoo in zucca on sgrizz de saa;
Sia tó anca el liberamm de sto stremizi,
Ch’el m’obblega tremand a voltà straa:
Descascem quell bestion che me spaventa,
E fa trentun de già che t’ee faa trenta.
- ↑ r è li ajbella; come " l’è lì bella ": egli è già un pezzo. (Nota transclusa da pagina 88)
- ↑ ponzella: Avemaria infilzada (CHERUBINI). (Nota transclusa da pagina 88)
- ↑ dia: dei; v. penultima ottava di questo canto. (Nota transclusa da pagina 88)
- ↑ Plinio (lib. VII. cap. 30) riferisce che “il Divo Augusto non volle si abbruciassero i carmi di Virgilio quantunque il poeta l’avesse comandato nel suo testamento”. (Nota transclusa da pagina 89)
- ↑ ét traa, ecc.: letteralmente “hai gettato un bollore” cioè, ti dà vôlta il cervello. (Nota transclusa da pagina 89)
