4. Vo svoland, tscherchand sa praja,
Sün la terr’e sur il flüm;
Cric, cric, cric, cha ella cratschla,
Ais pel solit seis costüm.
5. Melapaina ch’ell’arriva,
Il prüm minister la do ’l gianter.
Beslas, sduns, curtels, furchettas
E mantins la fo ’l purter.
6. Melapaina ch’ell’ais tschanteda,
Ella scumainza a cratschler,
Cratschla no ün sach d’noviteds
E zuond pochas sun vardets.
7. Bain eir l’aivla qui s’approsma
Sco regina dels utschels;
Ün grand regal cha quell’als porta,
Ün sach plain stachieu d’nuschels.
8. Vain no tiers eir la gazella,
D’la regina ais la donzella;
Quella vain eir per udir
E ’l cumand per exequir.
9. Our dal god vain la tschuetta,
Ho üna laungia maladetta;
L’ho ün piz pestiferus,
Nun lasch’in pos ne mels ne prus.
10. Giunker giat, quel grand calfacter,
Fo gnau gnau in chadafö;
Vo intuorn fand sa visita,
Scha suot l’evna vain fat fö.
11. Vain d’las Indias papagagls,
Chi dell’aivla sun famagls,
Armaintets fich buondragius,
Per sentir discuors dascus.
