Il Vangelo di S. Matteo volgarizzato in dialetto milanese/Capp VIII
 |
Questo testo è completo. | |
| ◄ | Capp VII | Capp IX | ► |
Capp VIII.
2 In quella, vun, che gh’aveva la lebra, el ghe se vesinna, e ’l le adora, disendegh: Signor, se ti te vœut, tì te podet nettamm fœura.
3 E Gesù, slongand la man, l’ha toccaa, disendegh: Vuj insci, te see guarii. E subet gh’è andaa via la lebra.
4 E Gesù: Guarda ben de dill a quajchedun: ma va a fatt vedè del pret, e fa l’offerta del regal comandaa de Mosè, per daghen testimonianza.
5 Quand poeu l’è rivaa dent in Cafarnao, gh’è andaa a trovall on centurion, e ’l ghe s’è raccommandaa,
6 Disend: Signor, mì gh ’hoo in cà mè fiœu, che l’è paralitegh, e ’l tormenta maladettament.
7 E Gesù el gh ’ha ditt: Mì vegnaroo, e t'el curaroo.
8 E’l centurion el gh’ha rispost, disendegh: Mi sont minga degn, che ti te vegnet in cà mia: dì doma ona parolla, e mè fiœu el sarà guarii.
9 Perchè mi sont on omm, che dipend di alter, e gh’hoo sotta de mi di soldaa, e a vun ghe disi: Va, e lu el va: e a l’alter: Ven,e lu el ven: e al mè servitor: Fa sta robba, e lu le fa.
10 Gesù l’è restaa incantaa a senti sti robb, e ’l gh’ha ditt a qui, che ghe andava adree: In veritaa mì ve disi, che hoo mai trovaa tanta fed in Israell.
11 E mi ve disi, che tanti vegnaran de l’orient, e de l’occident, e se settaran giò, e staran in paradis cont Abramm, Isacch, e Giacobb:
12 Ma i fiœu del regno saran s’giaccaa fœura in di sit scur: là se caragnarà, e se tormentarà del dolor de dent.
13 Allora Gesù el gh’ ha ditt al centurion: Va, e che te succeda segond che te credevet. E in quell’istess moment el fiœu l’è guarii.
14 Essend andaa poeu Gesù in cà de Peder, l’ha vist la soa socera malada cont la fevera.
15 El gh’ha toccaa la man, e la fever la gh’è andada via. L’è levada su, e j’ha servii.
16 Quand pœu l’è staa sira, gh ’han presentaa tanti indemoniaa: e domà col parlà el mandava via i spiret: e’l guariva tucc i amalaa:
17 Per fà, che succedess quell, ch’aveva ditt Isaia profetta, ch ’ el dis: Lu l’ha ciappaa i noster maa: e l’ha sopportaa i noster mangagn. 18 Vedendes pœu intorna ona gran frotta de gent, Gesù l’ha daa orden de passà de là.
19 E on Scriba el ghe s’è vesinaa, e ’l gh’ha ditt: Maester, mì te tegnaroo adree, dove se sia.
20 E Gesù el gh’ha ditt: I volp gh’han i sò tann,e i usej del’aria i sœu nid: ma el Fiœu del’omm el gh’ha minga sit de mett giò el coo.
21 E on alter di sœu scolar el gh’ ha ditt: Signor, damm prima el permess d’andà a sotterà mè pader.
22 Ma Gesù el gh’ha ditt: Vegnem adree, e lassa, che i mort sotteren i sœu mort.
23 Essend pœu andaa in barca, i sou scolar gh’hin andaa adree:
24 Quand de lì on poo s’è traa per aria el mar, in manera che la barca l’era quattada de l’acqua, e lu intanta el dormiva.
25 Gh’è andaa vesin i sœu scolar, e l’han dessedaa disendegh: Signor, salven, nun vemm al diavol.
26 E Gesù el gh’ha ditt: Perchè gh ’ avii paura, o omen de poca fed? Allora l’è levaa su, e ’l gh’h a comandaa ai vent e al mar, e tutt s’è quietaa giò.
27 In manera che la gent l’è restada incantada, disend: Chi l’è quest chì, ch’el se fa ubbedi di vent e del mar?
28 E quand l’è staa sbarcaa de là del lagh in del paes de Gerasen, gh’è andaa incontra duu indemoniaa vegnuu foura di sepoltur, ch’eren tant infuriaa, che nissun podeva passà de là.
29 E s’hin miss a vosà, disend: Cossa gh’emm a che fà nun cont ti,Gesù fiœu del Signor? Te see vegnuu chi prima del temp per tormentamm nun?
30 E gh’era pocch lontan de lor ona troppa de porscej, che pascolaven.
31 Donca i indemoniaa el seccaven, disendegh: Se te ne cascet via de chì, trann insemma a quell rosc de porscej.
32 E lu el gh ’ha ditt: Andee. E lor inviandes hin andaa in mezz ai porscej, e subet tutta la troppa di porscej cont on gran bordeleri la s’è buttada in mar: e l’è creppada in l’acqua.
33 I pastor hin scappaa: e tornand in paes, han cuntaa su tutt sti robb, e ’l fatt di indemoniaa.
34 E subet tutta la cittaa l’è corsa fœura incontra a Gesù: e quand l’han vist, l’han pregaa de retirass di sò confin.