Pagina:Basile - Lu cunto de li cunti, Vol.I.djvu/371

jornata i. la coppella.

157

          Ca tuocche co le mane
          Ca chisse hanno doje facce,
          Una facce da nante, una dereto,
          Ed hann’autro a la lengua, autro a lo core;
          So tutte lavafacce e fegnemiente;
          Te coffeja, mette nmiezo¹.
          Dà la quatra, pascheja, piglia de paise²,
          Te nzavaglia, te ngarza, e te nfenocchia,
          E te mbroglia, e te ceca, e te mpapocchia
          Quanno isso te asseconna,
          Sacce ca, tanno, tu curre tempeste;
          Co lo risiilo mozzeca,
          Te mbratta co l’encomie,
          T’abbotta lo pallone,
          E sbotta lo vorzillo;
          Tutto lo fine sujo
          È da zeppolejare e scorcogliare,
          E co li vracche de le laude soje,
          E co le filastocche e paparacchie,
          Te caccia da lo core li pennacchie³;
          Che, schitto pe scroccare
          Quarche poco d’argiamma,
          Pe ire a le pottane o le taverne.
          Te venne le vessiche pe lanterne!
Fab. Che se perda de chisse la semmenta,
          Uommene ammascarate,
          Che songo, pe schiaffarece a no sacco,
          Fore Narciso, e drinto parasacco!
Iac. Siente mo de na femmena, che stace
          A chi vene, a chi vace⁴!
          Vide na pipatella,
          N’isce bello, no sfuorgio, na palomma,

---

1. (EO) mette miazo.
2. (ES) de paiso.
3. Danari.
4. Di una meretrice.