 |
Questa pagina è stata trascritta, formattata e riletta. | |
| 228 | lo cunto de li cunti |
cennosempre: «Orza mia, orza mia!» La mamma, che sentie sto taluorno, se magenaje, che l’orza l’avesse fatto quarche malo trattamiento, e dette ordene, che fosse accisa. Ma li serveture, ch’erano nnammorate de la domestechezza de l’orza, che se faceva amare da le prete de la via, avenno compassione de farene na chianca, la portaro a lo vosco, referenno a la regina ca n’avevano cacciate li picciole. La quale cosa venuto a l’arecchie de lo prencepe, fece cose da non se credere. Ed, auzatose, malato e buono1, da lo lietto, voze fare mesesca de li serveture. Da li quale sentuto comme passava lo negozio, se mese pe muorto a cavallo; e tanto cercaje e giraje, che, trovato l’orza, la carriaje de nuovo a la casa. E, postola drinto a na cammara, le disse: «bello muorzo de re, che stajo ncaforchiato drinto sta pella!, o cannela d’ammore, che staje nchiusa drinto sta lanterna pelosa!; a che fine faremo sti gattefelippe2, pe vedereme sparpatiare e iremenne de pilo mpilo3? Io moro allancato, speruto, ed allocignato pe ssa bellezza, e tu ne vide li testemonie apparente, ca io so arredutto ntierzo comm’a vino cuotto4, ca n’aggio si no l’uosso e la pella, ca la freve me s’è cosuta a filo duppio co ste vene! Perzò, auza la tela de sso cuojero setuso, e famme vedere l’apparato de sse bellizze!; leva, leva le frunne da coppa sso sportone, e famme pigliare na vista de ssi belle frutte!; auza sso portiero, e fa trasire st’uocchie a bedere la pompa de le meraviglie! Chi ha puosto a na carcere, tessuta de pile, n’opera cossi liscia?, chi ha serrato drinto no scrigno de cuojero cossì bello tesoro? Famme vedere sso mostro de grazie, e pigliate mpagamiento tutte le voglie meje; bene
