Non te ntenno spagliosca,
Ca sto parlare tujo mpapocchia e nfosca!
Col. Vì, ca, si tu me ntienne,
Te mezzarai tentore,
O pure de canoscere chi tegne;
Ed averrai gran gusto
Mparare st’arte nova, arte, che corre
Fra le gente chiù scautra;
Arte, che piglia a patto
No scarafone, che te para gatto!
Siente, sarà na forca de tre cotte1,
Che scopa quanto matte, e quanto allumma2,
Che n’auza quanto vede,
Ch’azzimma, quanto trova.
Ora chi sa sta tenta,
No le3 dà nomme nfamme
De latro marivuolo.
De furbo marranchino4,
Ma dirrà, ca se serve
De lo jodizio, e caccia li donare
Da sotta terra, abbusca, e saria buono
A campare fi drinto de no vosco;
Che s’approveccia, ed è no buono fante,
Saraco, tartarone e percacciuolo,
Corzaro de copella.
Che non perde la coppola a la folla5;
E, nsomma, co ssa tenta
Cossì bella e galante.
Piglia nomme d’accuorto no forfante!